Gol para familjes, Selahi: I pari i një serie të gjatë
"Presion nga tifozët, ju them pse festova si mysliman"
Lindon Selahi ishte një nga risitë e Edi Rejas në grumbullimin e fundit për ndeshjet me Turqinë dhe Moldavinë. 20-vjeçari mori minuta në ndeshje zyrtare me Kombëtaren A dhe së fundmi ka qenë edhe një nga futbollistët e rëndësishëm të ekipit Shpresa. Pas debutimit me kuqezinjtë, në fundjavën që lamë pas, ai gjeti edhe rrugën e rrjetës. E para për të në futbollin profesionist, duke kontribuuar në fitoren e Tuentes në kampionatin holandez. "Sigurisht që kishim pak presion nga tifozët. Ata duan gjithmonë që ne të fitojmë, por futbolli siç ka fitoret, ka edhe humbjet", ka nisur ai fjalën e tij për mediat holandeze pas golit të shënuar.
GOLI - Selahi ka shpjeguar edhe golin e tij të parë si profesionist. "Unë përpiqem të tregoj cilësitë e mia në çdo ndeshje dhe të jap gjithçka nga vetja. Është një ditë speciale për mua, pasi është goli im i parë në futbollin profesionist. E gjithë familja ime ishte në stadium dhe jam shumë i lumtur edhe për ta", ka treguar Selahi.
FESTIMI - Lojtari kuqezi ka treguar edhe festën e tij të parë për një gol: "Çdo gjë që ndodh në jetën time vjen prej Zotit. Unë jam mysliman dhe jam krenar për këtë. Zoti më ndihmoi të shënoja golin.
Uroj të jetë i pari i një serie të gjatë golash. Do bëj maksimumin në ndeshje dhe maksimumin të shënoj".
FITORJA - Tuente nuk po kalon sezonin më të mirë të mundshëm dhe këtë e shpreh edhe shqiptari. "Ndihem
shumë mirë që fituam pas një situate të vështirë. Kemi treguar se çfarë ekipi kemi dhe tani varet nga ne që të vazhdojmë kështu. Personalisht mundohem të zbatoj detyrat që më jep trajneri. Ne jemi stërvitur mjaft mirë gjatë javës dhe kjo u reflektua edhe në ndeshje", ka vijuar futbollisti 20-vjeçar.
KONKURRENCA - Selahi është prej atyre futbollistëve që kanë shfaqur grintë dhe cilësi në mesfushë e në ndeshjen e fundit, ai gjeti edhe rrugën e rrjetës. Mirëpo, për një 20-vjeçar konkurrenca është shumë e madhe. "Mësoj shumë nga shokët e ekipit, në çdo stërvitje. Është mirë që lojtarët e rinj të mësojnë prej atyre me eksperiencë. Unë mendoj se konkurrenca është vetëm e mirë". Ka deklaruar Lindon Selahi.