Marota kënaq Konten: Në janar ka blerje
Administratori i deleguar: Merkaton e ardhshme korrim mundësitë
Asambleja e or takëve të Interit ka miratuar ditën e djeshme bilancin deri në 30 qershor 2019 me një humbje prej 48,4 milionë eurosh, në rritje krahasuar me 17,7 të bilancit 2018. Arkëtimet e konsoliduara, në krahun tjetër, kanë prekur kuotën rekord prej 417 milionësh (+20% krahasuar me 347 milionët e bilancit të kaluar). Shifrat konfirmojnë një trend në rritje për zikaltrit. “Suning” e mori klubin në 2016-ën me një xhiro prej 207 milionësh dhe e ka ngjitur në kuotën 377 milionë euro xhiro, në rritje të ndjeshme krahasuar me 297 milionët e bilancit 2017-’18, falë 52 milionëve të siguruar nga Champions-i. Ndër të tjera, në Kinë fansat zikaltër janë rreth 120 milionë, në rritje me 30% krahasuar me sezonin paraardhës. Stadiumi dhe Spaleti -
Janë në rritje edhe arkëtimet nga stadiumi, të gjeneruara nga një mesatare rekord prej 61.419 spektatorësh. Investimet për përforcimin e skuadrës përfaqësohen nga një rritje e pagave, nga 156 në 193 milionë, dhe e amortizimeve, nga 88 në 96 milionë. Edhe për shkak të shtimit të shkarkimit të Luçiano Spaletit (26 milionë euro) rezultati neto është përkeqësuar krahasuar me një vit më parë. Interi megjithatë bën të ditur se “ka plotësuar kërkesat e UEFA-s, duke dalë kështu nga regjimi i ‘settlement agreement’ të firmosur majin e 2015-ës dhe ka treguar stabilitet në performancë”.
Merkato - Interi, ndërkohë, sipas trajnerit Antonio Konte, ka nevojë për përforcime në mënyrë që të evitojë rrezikun e përdorimit të tepërt
të lojtarëve në gatishmëri. Për të mbajtur ritmin e Juventusit, pra, nevojiten afrime në janar, edhe sepse lodhja shton rreziqet e dëmtimeve. Bie dakord me teknikun zikaltër edhe administratori i deleguar Xhuzepe Marota, i cili gjatë asamblesë së ortakëve
ka deklaruar: “Ashtu siç është e drejtë, trajneri nuk kënaqet kurrë dhe shqetësohet nëse skuadra është në vështirësi. Kjo, sepse një pjesë e lojtarëve nuk janë në formë apo të dëmtuar dhe kjo i krijon shumë probleme. E pranojmë këtë moment
emergjence, megjithatë jemi të vetëdijshëm që mund të rritemi akoma. Shohim nga merkatoja e janarit me optimizëm të madh. Duhet të respektojmë ekuilibrat ekonomiko-financiare, por jemi gati të shfrytëzojmë rastet”, përfundoi Marota.