"Demat" stërviten në Elbasan, shqetësojnë Telushi dhe Boldor
Pavarësisht se barazimi ndaj Kukësit i dha mundësinë Partizanit të qëndrojë i vetëm në krye të klasifikimit, me sa duket trajneri Franko Lerda kërkon të shohë çdo gjë me detaje, sidomos gabimet. Para se të startonte seanca e djeshme stërvitore në kompleksin "Pepa" në Elbasan, italiani së bashku me ndihmësin e tij, Xhakomo Kini, për më shumë se 10 minuta ndoqën më konkretisht këto raste nëpërmjet videos, të cilat u mbajtën shënim nga tekniku dhe ua bëri të ditura më pas lojtarëve kur startuan përgatitjet. Me sa duket, italiani ka pasur pakënaqësi nga kjo ndeshje dhe kërkon të mos përsëriten në sfidat e ardhshme. E radhës është ajo me Luftëtarin të dielën në kryeqytet, që në letër duket e lehtë, por që "demat" kanë vuajtur shumë ndaj këtij kundërshtari në sezonin që fituan titullin pas 26 vitesh.
DËMTIME DHE MUNGESA - Bruno Telushi pritet të mungojë sërish në përballjen e radhës. Para stërvitjes së djeshme vlonjati nuk është zhveshur me pjesën tjetër të skuadrës, duke qëndruar sërish pushim. Me sa duket, stafi mjekësor nuk kërkon ta vërë në rrezik mesfushorin. Mbetet për t'u parë këto dy ditë se çfarë do të ndodhë, por gjasat janë që të mos jetë i gatshëm ndaj gjirokastritëve. Ndërkohë, edhe rumuni i mbrojtjes, Deian Boldor, ka probleme fizike, edhe pse në dukje jo të asaj natyre sa të rrezikojë sfidën me Luftëtarin. Dje rumuni kreu vrapime të lehta përreth fushës. Sa i përket pjesës tjetër të ekipit, kanë kryer një stërvitje normale, ndërkohë që u vu re mungesa e kapitenit Alban Hoxha. Mësohet se portieri ka marrë leje në klub për një problem personal dhe jo për arsye fizike. Sot grupi pritet të jetë më i plotë, teksa i gatshëm rikthehet edhe mesfushori Romero, që ka shlyer pezullimin.