Kaos me ligjin e sportit, nuk u miratua as në tetor
Dhuna ndaj një arbitri futbolli në fushën e stadiumit "Kamza" u bë shkak që e gjithë kupola qeverisëse të ulej në një tryezë bisedimesh, madje edhe në praninë e kamerave që e transmetuan direkt. Premtimet u bënë, ama deri më tani, mbahet mend vetëm pyetja e presidentit të Skënderbeut, Ardian Takaj: "A do të ketë afat për këto ligje apo do mbeten vetëm si premtim elektoral?"
IKU TETORI - Sot është data 31 tetor dhe në përfundim të kësaj date, do të kalojnë plot dy muaj që nga kur u premtua se do të kishte një paketë ligjore të miratuar për të gjitha problemet dhe pikëpyetjet që ka sporti. Fakt është që situata alarmante në ditët e sotme, jo vetëm në futboll, por edhe në sporte të tjera, e ka bërë më shumë sesa jetike nevojën e ndryshimeve në disa ligje që të mundësojnë zhvillimin e futbollit apo sporteve të ndryshme dhe që i çojnë ato deri në nivelin e mbijetesës normale brenda kontekstit legjitim. Edhe në këtë muaj, nuk u bë asgjë referuar sportit, ligjeve dhe ndryshimeve që priten nga dita në ditë.
PREMTIMI - Në takimin e zhvilluar mes qeverisë dhe botës së sportit, u premtua zgjidhja e madhe: PAKETA LIGJORE. Po, u trumbetua si zgjidhja për pikëpyetjet dhe problemet që aktualisht ka sporti sot. Në atë tryezë bisedimi, prezent ishte kreu i qeverisë, Kryeministri Edi Rama, ministra të kabinetit të tij, presidenti i FSHF-së, Armand Duka, e shumë presidentë të klubeve të futbollit apo edhe të tjerë drejtues në sporte të ndryshme. Po, është e gjitha e regjistruar dhe e transmetuar direkt edhe në kanalet e komunikimit zyrtar të Kryeministrisë. Jo vetëm kaq, por në fjalën e tij përpara mediave në Kryeministri, në fund të muajit korrik, Kryeministri Edi Rama premtoi shtatorin si muajin kur paketa me ndryshimet ligjore do të kalonte për t'u dhënë përgjigje pikëpyetjeve dhe kërkesave të mëdha. Deri tani? ASGJË! Sporti po lëngon dhe askush nuk ka bërë asgjë për të diskutuar në Parlamentin e Shqipërisë, disa ligje që shërbejnë për zhvillimin e sportit në vend. Edhe sa muaj do të presim për këtë?