Taipi: Po luhet një kampionat i çuditshëm
Mesfushori Shqipërim Taipi luan sezonin e dytë radhazi në Korçë. I aktivizuar në 6 nga ndeshjet e deritanishme si titullar, 22-vjeçari po bind me paraqitjet e tij. I kontaktuar nga “Panorama Sport”, Taipi foli dje për veten, ekipin dhe synimet e Skënderbeut.
Taipi, keqardhje që dolët vetëm me një pikë nga Vlora?
Nuk mund të themi se një pikë në Vlorë është një rezultat i keq. E di që ju niseni nga pozicioni që ka Flamurtari në renditje, por në fushë ishte një ekip shumë i motivuar, që kërkonte me çdo kusht pikët. Kjo e bënte më të vështirë takimin. Na vjen keq vetëm për faktin se ndeshjen e kishim në dorë dhe mbi të gjitha kemi shpërdoruar shumë në fund, duke mos marrë dot maksimumin.
Ekipi nuk ka vazhdimësi. Çfarë ka që nuk shkon?
Nuk ka asgjë që nuk shkon, por ky kampionat po bëhet i gjithi i çuditshëm. Asnjë ekip nuk po del pretendent kryesor për titull që të bëjë rezultate pozitive radhazi.
Çfarë doni të thoni me këtë?
Dua të them se faza e parë tregoi më së miri se ekipet janë aty-aty për sa i përket forcës së tyre. Jo më kot është edhe kjo situatë e ngjeshur në renditje. Kampionati po zhvillohet çuditshëm dhe mund të fitosh dhe humbësh me këdo. Prandaj, kujdesi dhe përqendrimi tani duhet të jetë më i madh.
Çfarë po ndodh realisht me Skënderbeun?
Dihet shumë mirë se si e filluam kampionatin këtë vit. Kishim shumë ndryshime dhe pak kohë në dispozicion. Por, po të shihni ndeshjet e fundit, jemi rritur mjaft. Them se në vijim do të jemi më mirë.
Ekipi pëson shumë dhe shënon pak. A e shihni si problem?
Pa dyshim vlen ajo që thashë më sipër, duhet të përmirësohemi. Trajneri insiston te tranzicioni negativ që duhet të përmirësojmë. Unë them se duhet të jemi grup si në mbrojtje ashtu edhe në sulm. Këtë e treguam në ndeshjen me Kukësin.
Ndaj Laçit besoni se mund të riktheheni te tri pikët?
Në ndeshjet e fundit ne kemi kërkuar të marrim gjithnjë maksimumin. Laçi ka ndryshuar trajner dhe është kthyer në një ekip të rrezikshëm. Do ta shohim në video dhe do të gjejmë zgjidhjen e duhur për mënyrën e lojës.
Si ndiheni me Dajën në mesfushë?
Ndihem mjaft mirë, pasi është një lojtar që lëviz shumë dhe të mbulon gabimet që mund të bësh. Kombinohemi mirë dhe them se mund të përmirësohemi akoma.