Ocelli: Partizani të mos e diskutojë titullin

"Nëse ka profesionalizëm, e drejta është me Lerdën"

Adnan Ocelli mbështet trajnerin Franko Lerda për të gjitha polemikat e krijuara kohët e fundit te Partizani. Ish-kapiteni kampion i të kuqve në sezonin 1992-1993, në një analizë enkas për "Panorama Sport" rreth startit të sezonit të "demave", thekson se cilësia në kampionatin shqiptar lë shumë për të dëshiruar. Ish-mbrojtësi mendon...

Adnan Ocelli mbësh tet trajnerin Franko Lerda për të gjitha polemikat e krijuara kohët e fundit te Partizani. Ish-kapiteni kampion i të kuqve në sezonin 1992-1993, në një analizë enkas për "Panorama Sport" rreth startit të sezonit të "demave", thekson se cilësia në kampionatin shqiptar lë shumë për të dëshiruar. Ish-mbrojtësi mendon se Partizani nuk duhet ta diskutojë titullin, ndërsa pret më tepër nga të rinjtë.

Partizani kryeson Superioren pas 12 javësh. Çfarë përshtypjeje ju ka bërë ky kampionat dhe a keni pritur më tepër nga të kuqtë?

Partizani vërtet kryeson dhe po luan me autoritetin e kampionit, por nuk duhet të gabojë me ekipet e ashtuquajtura të dobëta. Duhet ta dinë shumë mirë se kampionati kalon nëpërmjet tyre. Mendoj se në kampionatin tonë ekziston një problem, që ekipet pretendente, të cilat kanë filluar përgatitjet shumë më herët, nuk tregojnë atë dominim ose me saktë diferenca me klubet që kanë probleme dhe kanë nisur stërvitjen vetëm 10 ditë para startit të sezonit.

Si e shpjegoni këtë fenomen?

Kjo tregon dobësitë e këtij kampionati. Dikush mund të thotë se është edhe çështje nënvlerësimi. OK, por nga ana profesionale një ekip që përgatitet për në Evropë apo për të qenë kampion dhe tregon dobësi të tilla me skuadra që si pasojë e problematikave kanë mangësi, mendoj se konfirmon dobësinë e këtij kampionati. Kur shoh se këtë problem kanë edhe ekipe të tjera pretendente, më bën të mendoj se cilësia lë shumë për të dëshiruar. Këto janë problematika, që duam apo nuk duam, na pëlqejnë ose jo, janë evidente.

Në ndryshim nga sezoni i kaluar, Partizani e ka humbur qetësinë prej përplasjeve të vazhdueshme mes trajnerit Lerda dhe bashkëpunëtorëve të tij, por edhe me lojtarët...

Nuk mendoj se Partizani e ka humbur qetësinë. Megjithatë, përgjegjësia si kampion, presioni për të ruajtur këtë status mund të ngjallë edhe polemika. Janë situata normale brenda grupit dhe familjes. Pra, janë të pritura dhe të njohura edhe në klube të mëdha në botë. Te ne

ka akoma mungesë profesionalizmi për drejtimin e një klubi. Ekipi ka një bord drejtues, ka një staf, pra ka një shkallë hierarkie që duhet respektuar. Në profesionalizëm lojtari duhet t'i përgjigjet vendimit të trajnerit, po ashtu edhe ndihmësi i tij. Ai mund të debatojë me trajnerin në planin taktik në ambientet e klubit, fundja vendimmarrësi është Lerda. Në fund, ai do të vlerësohet pozitivisht ose negativisht. Nëse flasim për profesionalizëm, në këndvështrimin tim, e drejta është në anën e trajnerit për rastet që kanë

ndodhur së fundmi.

Përtej problemeve që ka pasur trajneri, sërish klubi i ka dhënë besim. Mendoni se ka bërë mirë?

Po, sepse duke respektuar këto norma për të cilat fola më sipër, në bazë të një bashkëpunimi si bord profesionist, vazhdon t'i besojë punës së tij.

Duke parë rivalët për titull, si e shikoni garën dhe a mendoni se Partizani me grupin që ka mund të bëjë diferencën duke u shkëputur në krye?

Për titullin duhet shumë djersë, punë dhe sakrifica.

Partizani mendoj se i ka të gjitha, por nëse gabon gjatë rrugës me ekipet që kanë probleme dhe nuk janë në atë nivel, do ta vështirësojë tej mase. Këtu është edhe Kukësi, edhe Tirana, Teuta etj. Kjo është problematikë e futbollit tonë.

Me aq sa keni parë deri më tani, ju bind loja që bën Partizani?

Partizani është në vend të parë dhe ka momente që bind si kampion, por ka edhe momente kur cilësia nuk përputhet me objektivat dhe financimet që janë bërë e vazhdojnë të bëhen për të ndërtuar një klub kampion. Secili trajner, në bazë të filozofisë së tij dhe të grupit që ka, ndërton strategjinë për objektivat që ka. Për sa i përket renditjes, aktualisht ekipi është në rregull, por për vetë kualitetet që ka brenda, mendoj se duhet të jetë ndryshe. Lojtarët duhet të mësohen me profesionalizmin, pasi asnjë trajner nuk do që të humbasë. E ritheksoj se profesionistë janë ata lojtarë që duhet t'i përgjigjen filozofisë së trajnerit. Pastaj, Lerda duhet t'u marrë atyre më të mirën.

Gega e shpalli Partizanin kampion dhe u largua, por arsyet mbetën mister. Mendoni se në këtë aspekt klubi bëri një figurë të keqe?

Gega përmbushi një objektiv që kishte kohë që përgatitej dhe pritej. Arsyet nuk janë të nevojshme të bëhen publike. Këto janë marrëdhënie pune të dyanshme dhe kur ekuilibrat lëvizin, edhe prishen. Ky është një profesion dhe nuk mendoj se këtu ka prishje imazhi. Janë situata të ndërsjella, si klubi dhe bashkëpunëtori.

Ka ndonjë lojtar që ju ka befasuar për mirë?

Trashi tregoi më së miri se është rritur si nivel dhe kualitet në një ekip kampion. Këto po i tregon edhe me përfaqësuesen. Këtu është edhe Hoxha e Telushi, që janë liderë të këtij ekipi, por talentet e rinj duhet të bëjnë akoma më shumë. Nuk mjafton të jesh vetëm talent.

Shpesh Lerda ka përdorur skemën me 3 mbrojtës e më pas e ka ndryshuar. Me cilin variant mendoni se përshtatet më mirë skuadra?

Skema mund të modifikohet në bazë të kundërshtarit dhe të lojtarëve të veçantë. Nuk dua të hyj në këtë pjesë, sepse i përket trajnerit dhe stafit. Ata kanë të drejtë të bëjnë zgjedhjen e duhur për kundërshtarë të ndryshëm.