Dalipi: S’është Elbasani për vend të fundit
Drejtori sportiv thekson se ekipi tani po tregon vlerat e veta
Kur prodhon lojë, vjen një ditë që edhe shpërblehesh në futboll. Kjo i ndodhi Elbasanit në sfidën e fundit ndaj Ilirisë, ku fitoi me rezultatin 3-1 dhe u ngjit në kuotën e gjashtë pikëve. Gjatë këtyre javëve elbasanasit kishin zhvilluar ndeshje të mira përgjithësisht, por pa marrë dot pikët, ndaj dhe janë ende në vend të fundit në Grupin B. Por tashmë duket se durimi po justifikohet dhe loja po sjell frytet e saj. Në një prononcim për “Panorama Sport”, drejtori sportiv i Elbasanit, Sabri Dalipi, shprehet optimist për ecurinë e mëtejshme, pasi tani skuadra e ka marrë veten plotësisht dhe afrimet e verës po e ndihmojnë atë. Sipas tij, Elbasani ka merituar më shumë pikë në klasifikim, por gjithsesi ka kohë për të rikuperuar gjithçka në javët e mbetura. “Fitorja e fundit me Ilirinë na lehtësoi disi sa i përket klasifikimit dhe pikëve. Djemtë treguan shpirtin e tyre luftarak dhe arritën të përmbysnin shifrat, duke siguruar në fund fitoren që ishte shumë e rëndësishme. Tani po dalin në pah vlerat e vërteta të skuadrës, jo se më parë kemi luajtur keq, por na kanë munguar pikët. Normalisht, një skuadre me djem të rinj i duhej dhënë kohë dhe mendoj se lojtarët po e arrijnë pak e nga pak pjekurinë. Nuk është Elbasani për në vend të fundit dhe shumë shpejt do të largohemi nga ky pozicion. Një falënderim kam për presidentin Arben Laze, i cili po i qëndron pranë klubit edhe në këto ditë të vështira”, u shpreh për gazetën drejtori Dalipi, i cili e mori këtë pozicion në verë dhe ka dhënë kontributin e tij në formimin e skuadrës për këtë edicion. Ndeshjen e radhës verdheblutë e kanë në fushën e Shënkollit, rivali më i afërt i tyre në luftën për mbijetesë. Ata shpresojnë të ecin në vazhdën e rezultateve pozitive.