Prifti lë Fierin për Anglinë, Apolonia fiton të rinjtë
Trajneri Mërgjyshi ka aktivizuar 10 të rinj në formacion
Krisel Prifti nuk do të jetë më pjesë e Apol onisë. Mesfushori ka ndërprerë me mirëkuptim kontratën me klubin fierak dhe për arsye familjare është zhvendosur në Mançester të Anglisë. 24-vjeçari ka qenë pjesë e Apolonisë prej sezonit 2016-2017 dhe gjatë kësaj periudhe, ku është penalizuar shumë nga dëmtimet, është aktivizuar 2837' në 44 ndeshje, ku ka shënuar 4 gola. E ka një “mesazh lamtumire” Kriseli, i cili shfaq mbresat e tij për përvojën tek Apolonia. “Për mua, Apolonia ka qenë qysh në fillim ekipi me organizimin më të mirë, duke nisur nga akademia e deri në ekipin e parë. Ndoshta është skuadra e vetme në Shqipëri që i plotëson të gjitha standardet. Ka përkushtim në rritje në të gjitha hallkat dhe është një klub gjithnjë kërkues drejt talenteve. Në Shqipëri ky është problem, sepse shumë ekipe kanë talentet e tyre, por nuk i shfrytëzojnë si tek Apolonia. Ky klub ka pasur dhe ka besim te të rinjtë dhe ja ku po vijnë rezultatet. Për mua ka qenë si ekipi ‘mëmë’, pasi te Flamurtari asnjëherë nuk e kam ndier përkrahjen dhe ngrohtësinë si në Fier. I uroj suksese skuadrës sime të zemrës dhe besoj se me trajnerin Mërgjyshi objektivi drejt Superiores është i realizueshëm”, thotë për gazetën tonë ish-futbollisti i Apolonisë, tanimë në Mançester, Krisel Prifti.
EKIP U-21 - Prej disa sezonesh Apolonia ka pretenduar të ndërtojë një ekip cilësor me prioritet elementët e rinj të talentuar, por këtë vit ka një trend realisht të prekshëm dhe konkret. Nga pretendimet që ka opinioni sportiv ndaj Apolonisë si emër tradite, pritet shumë më
tepër, por harrohet një detaj shumë esencial, është një ekip me moshë shumë të re dhe vendi i 3-të në 8 javë të kampionatit duhet vlerësuar pozitivisht, pavarësisht ulje-ngritjeve. Meritën kryesore për këtë pa diskutim e ka trajneri Artan Mërgjyshi, një “nuhatës i hollë” i talenteve që di të ndërtojë pa u ankuar një skuadër kompakte dhe dinjitoze. Apolonia e këtij edicioni është ilustrimi më i mirë për këtë trajner. Janë plot 10 futbollistë të moshës 19-21 vjeç të aktivizuar prej tij në formacion gjatë 8 javëve të para të kampionatit. Pa harruar
që disa prej këtyre të rinjve luajnë jashtë pozicionit natyral, çka i shton më shumë pikë kësaj skuadre. Ecuria e të rinjve të Apolonisë nuk është e rastësishme, pasi plot 7 futbollistë të grup-moshës 1921 vjeç kanë disa sezone që aktivizohen me këtë ekip. Eljon Sota dhe Ksement Mehmeti, të dy 21 vjeç, luajnë sezonin e katërt, Mario Gjata 19 vjeç, Redon Mihana 20 vjeç dhe Romeo Harizaj 21 vjeç, luajnë sezonin e tretë, Krisild Zoga 19 vjeç luan sezonin e dytë, ndërsa Sali Kumani 19 vjeç, Sokol Ymeraj 20 vjeç dhe Erisildo Smaçi 21 vjeç, janë debutues.