Sauthgejt: Sterling është zemëruar me mua

"Tre Luanët" e presin biletën me 1 pikë sot ndaj Malit të Zi

Garet Sauthgejt pra non përpara ndeshjes së sotme kundër Malit të Zi se Rahim Sterling mund të jetë i zemëruar me të, pasi ai e dënoi duke e lënë jashtë takimit të sotëm ndaj ballkanasve në kualifikueset e "Euro 2020". Sulmuesi i Sitit dhe mbrojtësi i Liverpulit, Xho Gomez, patën një sherr fizik në ditën e parë të grumbullimit (të hënën) në bazën e kombëtares, "St George's Park", 24 orë përpara se të konfrontoheshin në "Anfield" në Liverpul-Siti. Në konferencën për shtyp në prag të ndeshjes së 1000-të ndërkombëtare të "Tre Luanëve", Sauthgejt mund ta shijojë kualifikimin, pasi i duhet vetëm 1 pikë. Por ishullorët mund të festojnë sërish nëse Kosova mundet nga Republika Çeke. Gjithsesi, kualifikimi i Anglisë është vetëm një formalitet dhe vëmendjen e zë çështja "Sterling-Gomez". "Unë mund ta kuptoj nëse Sterling është i mërzitur me mua, por në fund ai mbetet pjesë e grupit dhe kjo është gjëja më e rëndësishme. Ai është një pjesë shumë e rëndësishme e kësaj skuadre, po stërvitet shumë mirë dhe për mua kjo është një çështje e mbyllur", tha Sauthgejt. "Kur unë isha futbollist, marrëdhënia ime me trajnerët dhe se si unë ndihesha për ta ndryshonte me ditë dhe kishte shumë raste kur unë isha i zemëruar me ta, zakonisht kur nuk luaja. Kështu që, unë e kuptoj këtë dhe shpresoj që koha t'i kapërcejë këto gjëra. Si trajner, ti shpreson që t'u dhurosh momente të bukura futbollistëve, siç është debutimi apo shansi të luajë. Por ka edhe raste të pashmangshme kur nuk i aktivizon, duhet t'i zëvendësosh dhe ndonjëherë ata nuk do të kërcejnë nga gëzimi kur të shohin fytyrën time teksa kalon në mensë", shtoi tekniku anglez.