Santos nxjerr blof Sarrin: CR7 s’ka dëmtim
“Me Lituaninë do të luajë, madje edhe do të shkëlqejë”
Kristiano Ronaldo nuk ka asnjë dëmtim, madje kundër Lituanisë do të zbresë rregullisht në fushën e lojës. Është ky lajmi që vjen nga selia e kombëtares së Portugalisë, me trajnerin Fernando Santos që e ka konfirmuar këtë fakt edhe përballë gazetarëve të pranishëm. Dhe sigurisht që një dalje e tillë ka bërë menjëherë jehonë të madhe, sepse kur bëhet fjalë për CR7-ën, vëmendja është gjithmonë maksimale, aq më shumë pas polemikave që lindën pas ndeshjes së Juventusit, kundër Milanit. Në këtë takim Ronaldo u zëvendësua në minutën e 55-të me justifikimin se vuante një dëmtim, por me deklaratën e tij trajneri Santos duket sikur nxjerr blof trajnerin Mauricio Sarri, por në të njëjtën kohë jep material që doza e polemikave të shtohet edhe më shumë mbi argumentin në fjalë. Gjithsesi, nëse nga Torinoja nënvizojnë se shokët e skuadrës e kanë falur sjelljen e Kristianos dhe pritet paqja mes palëve pas ribashkimit në Torino, Fernando Santos garanton se kapiteni i kampionëve të Europës në fuqi do ta nisë nga minuta e parë eliminatoren ndaj Lituanisë. “Nëse
unë e grumbullova Kristianon, kjo do të thotë se ai jo vetëm nuk ka asnjë dëmtim, por është shëndoshë dhe do të luajë nga minuta e parë, - nënvizon trajneri i Portugalisë, i cili pasi pyetet nga një gazetar spanjoll për arsyen pse të gjithë duan të flasin për Ronaldon, Santos përgjigjet. – Të gjithë duan që të bëjnë lajm me Ronaldon dhe të
flasin për atë, sepse ‘Kris’ është futbollisti më i mirë në botë. Gjithsesi, unë nuk jam këtu për të folur për Ronaldon, por për ndeshjen mes Portugalisë dhe Lituanisë, ndaj nuk do t’i përgjigjem më asnjë pyetjeje për atë”.
Misteri vazhdon - Pas Juventus-Milan, në të cilën Sarri zëvendësoi Ronaldon me
Dibalën, i cili zgjidhi ndeshjen me një gol kryevepër, trajneri bardhezi e justifikoi rendimentin e CR7-ës me një dëmtim në gju, që e përndiqte prej kohësh. Por, nga selia e kombëtares së Portugalisë thonë gjëra të tjera, madje pas trajnerit Santos edhe shoku i tij i skuadrës, Ruben Neves, konfirmon: “Kristiano është shumë mirë. Është stërvitur çdo ditë me regjim të plotë dhe e kemi parë shumë të motivuar për ndeshjen me Lituaninë. Unë nuk di të them se çfarë nënvizojnë nga Italia, por kundër Lituanisë do të jetë në fushë nga minuta e parë dhe madje edhe do të shkëlqejë, si gjithmonë”.