Devolli prezanton Fetollarin, trajneri nis punën të hënën

Drejtuesit e Devollit kanë prezantuar dje trajnerin e ri të ekipit, pogradecarin Festim Fetollari. Ashtu siç kishte paralajmëruar gazeta në numrin e djeshëm, Fetollari u takua dje me drejtuesit e klubit bilishtar dhe pasi bisedoi me ta, arriti akordin për ta drejtuar Devollin deri në fund të këtij kampionatit. Trajneri i ri u prezantua para grupit të futbollistëve nga donatori Gëzim Xhaçi, para seancës stërvitore të zhvilluar në Korçë, por ai do ta nisë zyrtarisht punën në krye të Devollit ditën e hënë. Ekipi është drejtuar edhe dje nga ndihmëstrajneri Maneshi. Me një postim në faqen zyrtare të klubit, Devolli bënte të ditur lajmin e emërimit të trajnerit të ri, ndërkohë që falënderonte edhe trajnerin e larguar, Stavri Nicën, për kontributin e dhënë gjatë periudhës që ai e drejtoi këtë ekip. Fetollari, një nga ish-futbollistët më të njohur pogradecarë, ka drejtuar ekipin liqenor sezonin e fundit dhe është një trajner që dallohet për disiplinë të fortë sportive. Ai ka në dispozicion kohën e mjaftueshme për ta njohur më mirë grupin e futbollistëve deri në ndeshjen me Turbinën, që luhet fundjavën e ardhshme në Cërrik. Disa prej lojtarëve i njeh, sepse i ka pasur te Pogradeci. Devolli qëndron në pozita të mira në renditje, mban vendin e 4-t, kështu që trajneri i ri nuk do të ketë presionin e rezultatit. Gjithashtu, grupi i futbollistëve është i kompletuar dhe pogradecari mund të punojë i qetë, duke nisur nga dita e hënë, kur do të marrë në dorë “çelësat” e Devollit.

PAGAT - Bashkë me zgjedhjen e trajnerit të ri, drejtuesit bilishtarë kanë bërë dje edhe likuidimin financiar të ekipit me pagat e prapambetura, kështu që lojtarët pritet të jenë edhe më të motivuar për vazhdimin e kampionatit, duke nisur nga transferta e Cërrikut. Gazeta mëson se ishin dy pagat e prapambetura për ekipin bilishtar, një fakt që shton edhe më shumë dyshimet se ikja e trajnerit Nica nuk ka qenë vetëm për arsye shëndetësore.