Karlos Tevez, 1000 hamburgerë për bamirësi
Në shekullin e fundit, historia tregon se shumë futbollistë amerikano-jugorë kanë lënë vendin e tyre të origjinës për të kërkuar lavdinë në Europë, por kurrsesi nuk i kanë harruar vështirësitë, shpeshherë edhe drama, që u është dashur të përjetojnë në moshë të re, përpara se të çanin në arenën ndërkombëtare futbollistike. Një prej këtyre ngjarjeve prek edhe Tevezin, i cili pasi ka luajtur për shumë vite në disa prej klubeve më të mëdha të kontinentit të vjetër, është rikthyer në Buenos Aires. Ish-numri 10 i Juventusit nuk po përjeton një moment të artë për sa u përket paraqitjeve personale, duke qenë se këtë sezon ka koleksionuar vetëm 9 prezenca, me 3 gola të shënuar me bluzën e Boka Zhuniorsit, kryesuesen e kampionatit me pikë të barabarta së bashku me Lanusin dhe Argjentinos Zhuniorsin. Por nëse në fushën e lojës sulmuesi nuk po arrin që të lërë gjurmë të rëndësishme, ai po bën diferencën me shumë akte bamirësie në favor të banorëve të lagjes ku ka lindur, “Fuerte Apache”, nga i cili ka marrë edhe pseudonimin personal. Akti i fundit i zemërgjerësisë u bë i mundur në bashkëpunim të ngushtë me “McDonald’s”, i cili ka ngritur në këmbë një fushatë të quajtur “Great Day”. Kolosi amerikan i “fast food”-eve, në 24 orët e 15 nëntorit, do të dhuronte 100 për qind të fitimeve që do të vinin nga shitja e hamburgerit të tyre më të famshëm, “Big Mac”. Kjo fushatë bamirësie, që zgjat prej 25 vitesh në bashkëpunim me një fondacion që merret me fëmijët në nevojë, ka parë të ndihmohet edhe nga Karlos Tevezi, i cili i është përgjigjur në mënyrë të rëndësishme kësaj kauze. Futbollisti i Boka Zhuniorsit ka vendosur që të blejë 1000 hamburgerë, një gjest i cili bëri një jehonë të madhe mediatike, nisur edhe nga fakti se Karlos Tevezi është jo vetëm një ndër futbollistët më të njohur, por edhe ndër personat më influentë në Argjentinë. Dhe sigurisht që fama e tij nuk mund të mos bënte që kjo gjetje e sulmuesit të përhapej edhe në media, si një formë mesazhi sensibilizues edhe për shumë persona të tjerë të pasur në Argjentinë, të cilët vinin nga bota e sportit apo e spektaklit.