Mançini: Ky është vetëm fillimi

Vendosi rekord, por nuk feston: Tani mbyllim në perfeksion kundër Lihtenshteinit

Rekordi i 10 fitoreve radhazi (9 në elim inatore dhe 1 në miqësore) është një arritje madhështore, por Roberto Mançini nuk është nga ata tipa që ekzaltohet shpejt, pasi objektivi i tij është një dhe i vetëm, i cili dallohet qartë në sytë e tij: “Nuk dua të më bëhen krahasime me Vitorio Pocon (trajnerin legjendar italian), pasi ai ka fituar 5 trofe me kombëtaren, ndërsa unë e kam thënë dhe e ritheksoj, do më mjaftonte që të fitoja vetëm Europianin për të qenë i lumtur sa ai. Sigurisht që kur kalon një ikonë si Poco, është normale që gëzimi të të përshkojë trupin, por kjo nuk do të thotë se puna ime dhe e këtij grupi ka përfunduar.

Përkundrazi, kemi bërë 9 fitore në 9 ndeshje të këtyre eliminatoreve, prandaj tani dua edhe suksesin ndaj Lihtenshteinit, pasi vetëm kështu mund ta mbyllim me perfeksion, - nënvizon trajneri i “axurrëve”, i cili analizon edhe paraqitjen me Bosnjën.

– Nuk ishte aspak një ndeshje e lehtë, por ky është një grup fantastik futbollistësh. Është e vërtetë se ka pasur ndonjë ndeshje ku nuk kemi merituar të fitojmë, por është pikërisht këmbëngulja dhe fryma e sakrificës që shoh te të gjithë ajo që na ka bërë të dalim me tri pikë, edhe në transferta kaq të vështira sa kjo me Bosnjën. Prandaj, një duartrokitje këtij grupi fantastik, ndonëse mendoj se ky është vetëm fillimi. Kam shumë premisa nga këta lojtarë, pasi e di mirë se kemi ende shumë potencial brenda nesh, të cilin nuk e kemi shfaqur ende. Insinje në superformë? Po, jam i lumtur për Lorencon, duke parë edhe situatën e vështirë që po përjeton ai dhe skuadra e Napolit aktualisht. Gjithsesi më pëlqyen të gjithë, edhe Tonali, edhe Beloti, ndonëse sërish në 15 minutat e fundit e pashë ekipin të tërhiqej mjaft metra mbrapa dhe diçka e tillë nuk më pëlqen dhe nuk duhet të ndodhë, sidomos kur të luajmë në Europian”, përfundoi Mançini.