Tare sfidon Juven për Kumbullën, menaxheri: Ka oferta për Marashin
Drejtori i Lacios përgatit ofertën për shqiptarin
Lacio është gati që të shtojë koloninë e shqiptarëve. Skuadra bardhekaltër nuk kërkon që të humbasë mundësinë për të rrëmbyer futbollistët më të mirë të Kombëtares sonë. Bëhet fjalë për Marash Kumbullën, i cili ka arritur që të shkëlqejë që në sezonin e parë te skuadra e Veronës. Sipas “Corriere dello Sport”, Igli Tare mund të tentojë që ta rrëmbejë mbrojtësin 19vjeçar, madje ta heqë atë nga “thonjtë” e Juventusit që thuhet se e ndjek që prej merkatos së verës. Mbrojtësi i rritur në akademinë e Veronës ka shkëlqyer në këtë fillim sezoni, duke regjistruar 9 paraqitje në Serinë A e madje duke gjetur edhe një rast rrugën e rrjetës. MENAXHERI – Lidhur me situatën e Kumbullës ka folur edhe menaxheri i tij. Xhani Vitali, në një deklaratë të shkurtër për “Tuttomercatoweb” ka komentuar të ardhmen e të asistuarit të tij, duke sqaruar: “Marashi po paraqitet shumë mirë dhe të gjithë ne jemi të lumtur për ndeshjen e tij. Le të shpresojmë që të vazhdojë përsëri kështu.
Që tani e kanë kërkuar shumë klube, në Itali, por dhe nëpër Europë, megjithatë për momentin nuk kemi menduar transferimin. Sa i përket kombëtares italiane, Marashi nuk mund të zgjidhte askënd përveç Shqipërisë. Kombëtaret shqiptare e kanë grumbulluar gjithmonë, ndërsa Italia ka bërë me kohë zgjedhje të tjera”.
FORMULA – Këto fjalë kanë rezultuar një “asist” për Lacion, e cila po studion edhe formulën për të siguruar Kumbullën. “Çelësi” është një tjetër lojtar me gjak shqiptar. Bëhet fjalë për Valon Berishën, i cili nuk po kalon një formë të mirë te Lacio dhe në merkaton e janarit me shumë mundësi do të largohet. Megjithatë, aventura e mesfushorit mund të jetë përsëri në Serinë A, pasi një tjetër skuadër italiane interesohet për të marrë shërbimet e tij. Sipas asaj që shkruan “Corriere dello Sport”, futbollisti pëlqehet shumë nga Helas Verona, të cilët do të përpiqen ta transferojnë në janar. Madje, sipas të njëjtit burim, thuhet se Verona po mendon të fusë në marrëveshje edhe mbrojtësin tjetër shqiptar, Marash Kumbulla, për të mbërritur te Berisha. Kumbulla po kalon një formë të shkëlqyer në këtë sezon dhe një kalim te Lacio do të ishte i mirë për lojtarin, por edhe për klubin kryeqytetas, që do të kishte në organikën e tij një futbollist me të ardhme të madhe.