“Tërmet” 7 ballë, dëfrehet Spanja
Torres dhe Dani Olmo shkëlqejnë në debutim, iberikët sigurojnë vendin e parë
Spanja është si një tërmet 7 ballë që sh kund Maltën dhe siguron vendin e parë në Grupin F. Në Kadiz praktikisht nuk kishte ndeshje dhe vendësit dominuan gjithçka duke shënuar 2 herë në pjesën e parë dhe 5 herë në të dytën. Debutuesit shkëlqyen duke gjetur rrjetën dhe trajneri Moreno mori përgjigjet e duhura nga lojtarët që zbriti në fushën e lojës. Por a mjafton për të fituar Europianin? Në Spanjë e dinë se forcat duhet t'i matin me ekipe të mëdha dhe jo me Maltën.
Morata s'ndalet- Pasi ngeli jashtë në dy listat e mëparshme të Spanjës, Alvaro Morata po kalon momentin më të mirë të karrierës. Numri 7 i "furive të kuqe" hapi siparin e golave kundër Maltës duke gjetur rrugën e rrjetës për herë të 17-të me kombëtaren në 32 ndeshje të luajtura. Duke përfshirë edhe golat e shënuar me Atletikon e Madridit, në këtë sezon bëhen 7 sfida radhazi. Morata është në një moment fantastik dhe këtë e konfirmoi që në minutën e 23-të. U tregua shumë i zgjuar për të ndjekur një aksion në zonë dhe thjesht e shtyu topin në rrjetë. Ndeshja nuk kishte histori dhe Spanja arriti të shënonte golin e dytë me anë të Santi Kacorlës. Ky i fundit nuk gabon në hyrje të zonës dhe e dërgon topin pas shpinës së portierit Bonelo. Ishte goli i parë që pas rikthimit nga dëmtimi.
Goleada- Mbrëmja bëhet më spektakolare për ata që u aktivizuan në pjesën e dytë. Pau Torres prek qiellin me dorë pasi debuton dhe për 58 sekonda shënon golin e parë me fanellën e kombëtares së Spanjës. Kur nuk kishte përfunduar mirë festimi për këtë gol, Sarabia gjen rrugën për golin e katërt dhe e njëjta histori përsëritet me Dani Olmon. Edhe ai shënon në debutimin me kombëtaren e madhe të Spanjës. Malta nuk kishte forcë për të reaguar dhe thjesht numëronte golat e Spanjës. Moreno gjen rrugën e rrjetës për herë të gjashtë dhe Hezus Navas mbyll siparin me një supergol. Spanja dhuron spektakël dhe tregon se është gati për Europianin, por rivali as që llogaritej.