Dranga pret një Egnatia më solide fazën e dytë
Rrogozhinasit po vijojnë normalisht stërvitjen në drejtimin e trajnerit Artan Bano, sikur në fundjavë të kishte ndeshje. Në fakt, ndërprerja e kampionatit i prish punë Egnatias, por në këtë rast nuk ka çfarë bën dhe drejtuesit e klubit janë në kontakte me kolegët e tyre në klube të tjera për të luajtur ndonjë miqësore të shtunën. Për “Panorama Sport”, administratori Olsi Dranga u shpreh se Egnatia respekton çdo vendim dhe nuk e ndal punën për asnjë moment. “Jemi njohur me njoftimin e FSHF-së për shtyrjen e ndeshjes së fundjavës me Kastriotin. Respektojmë çdo vendim që vjen nga institucioni i futbollit dhe jemi në pritje të një vendimi të dytë për të mësuar se kur do të luajmë. Në këtë situatë nuk mbetet gjë tjetër veçse të organizojmë ndeshje miqësore, që i japin mundësinë stafit teknik ta mbajë ekipin në tonus. Ne nuk e largojmë vëmendjen nga objektivat që kemi për fazën e dytë. Përkundrazi, do kërkojmë të riparojmë të metat që kemi për të pasur një Egnatia sa më solide e dinjitoze, me synimin për t’u ngjitur në kreun e renditjes. Duhet të harrojmë hapat falsë që u bënë në ndonjë javë në fazën e parë. Kemi forca për një vend më të mirë. Përbërja që kemi në çdo repart na bën optimistë se objektivi sezonal është plotësisht i arritshëm. Të gjithë së bashku do t’i japim Egnatias atë që i takon midis shumë rivalëve në Grupin A”, ka thënë drejtuesi i klubit rrogozhinas. Egnatia po kalonte një formë të mirë javët e fundit, ku ka mundur Korabin dhe ka barazuar në Peqin ndaj Shkumbinit.