Dosti: Elbasani duhet të mbijetojë, një tjetër rënie do të ishte fatale
E la futbollin 25 vjeç, merr leksione prej ish-trajnerit të Mesit
Në Elbasan ka shpresë për mbijetesë, ndonëse e kanë mbyllur fazën e parë në vendin e fundit. Fakti që verdheblutë janë mësuar me të tilla situata këto sezonet e fundit, ka bërë që skuadra të mos kapet nga paniku. Në kësi kushtesh, po vazhdojnë punën për të arritur objektivat. Në një prononcim për “Panorama Sport” ishmesfushori Jurgen Dosti ka besim tek idetë dhe ajo që trajneri Shkëlqim Lleshanaku po implementon te skuadra. Ai e la futbollin në moshë të re për t’iu dedikuar trajningut, ndërsa kujtojmë që aktualisht është vetëm 28vjeçar. Gjatë kohës që luante si profesionit, numëron mbi 100 ndeshje te verdheblutë që prej sezonit 2010-2011 e deri në 20162017. “Një skuadër e ndërtuar pak ditë para startit të kampionatit dhe me djem të rinj është normale të hasë vështirësi në ndeshjet e para. Mirëpo, në javët e fundit Elbasani ka treguar me lojë dhe rezultat se meriton të ngjitet në klasifikim dhe të mos qëndrojë në vendin e fundit. Kam besim që idetë e trajnerit Lleshanaku po implementohen si duhet te lojtarët dhe rezultatet do të vijnë gjithnjë e në rritje. Të gjithëve u vjen keq për situatën e klubit, por kam besim se do t’ia dalin të mbijetojnë, sepse një tjetër rënie në të Dytën do të ishte e tepërt”, u shpreh fillimisht Jurgen Dosti, i cili ka besim se edhe këtë vit elbasanasit do të shpëtojnë. Puna sigurisht duhet të jetë e madhe, pasi gara këtë edicion është edhe më e vështirë. Qëllimi është që ta mbyllin vitin kalendarik pozitivisht dhe ndoshta në janar të ndërhyjnë edhe në merkato, duke i shtuar më shumë cilësinë organikës. EKSPERIENCA - Gjatë muajve të verës, Dosti ishte deri në SHBA, me ftesë të klubit Suseks Junaitid, për të marrë një trajnim nga ishtrajneri i Lionel Mesit, aktualisht teknik i shpresave të Danimarkës, Albert Kapelas. Mësimet që mori prej ish-teknikut të akademisë “La Mansia” në Barcelonë, Dosti do të mundohet t’i zbatojë me fëmijët që stërvit në klubin e Elbasanit. “Normalisht ishte një eksperiencë e bukur, për më tepër të stërvitesh me një trajner që ka trajnuar Mesin, Ksavin, Iniestën dhe të gjithë brezin e artë që kanë bërë histori në futbollin botëror. Aktualisht jam trajner për grup-moshat U-9 në klubin e Elbasanit dhe do të mundohem ta sjell këtë eksperiencë edhe këtu”, përfundoi Dosti, i cili ndihet i privilegjuar për mësimet që ka marrë nga ish-trajneri i Mesit. Vladimir Mema