Futbolli rimëkëmb, Duka: Do të ndërtojmë 3 banesa
Shqipëri-Kosovë-Maqedoni, federatat bëhen bashkë për kontribute
Kur rreziku është natyra, futbolli bëhet bashkë. Nismat për të ndihmuar familjet e prekura nga tërmeti tragjik që përfshiu Shqipërinë nuk kanë munguar dhe këtë herë nismëtarët janë bërë presidentët e tri federatave të futbollit. Të gjithë bashkë mund t'ia dalim të kalojmë këtë moment të vështirë që po jeton Shqipëria. Nisma - Presidenti i Federatës së Futbollit të Kosovës,Agim Ademi, dhe ai i Maqedonisë së Veriut, Muamed Sejdini, ishin dje të pranishëm në Durrës, teksa së bashku me Armand Dukën iu gjendën pranë qytetarëve në këto ditë të vështira që po kalon Shqipëria, pas tërmetit tragjik që mori shumë jetë njerëzish. Nëpërmjet një postimi në "Instagram", kreu i FSHF-së, Armand Duka, bëri me dije se së bashku me homologët Sejdini dhe Ademi do të marrin përsipër rindërtimin e 3 shtëpive të rrënuara nga tërmeti i fuqishëm. "Sot (dje) në Durrës prita dhe takova me kënaqësi miqtë dhe homologët e mi presidentë të Federatës së Futbollit të Kosovës dhe Federatës së Futbollit të Maqedonisë së Veriut, Agim Ademi dhe Muamed Sejdini,
të cilët shprehën dëshirën për t'iu bashkuar FSHF-së në kontributin për familjet e prekura nga tërmeti. Duke u nisur nga dëshira dhe nga gatishmëria nga i gjithë komuniteti i futbollit, ne marrim përsipër rindërtimin e tri shtëpive të rrënuara. Fushata e ndihmës nga ana e FSHF-së do të vijojë në ditët në vazhdim. Ne jemi një skuadër", ka shkruar presidenti Duka në rrjetet sociale.
UEFA - Një ditë më parë, Armand Duka bëri me dije se ka marrë telefonata, mesazhe dhe propozime për ndihmë konkrete nga presidenti i UEFA-s, Aleksandër Ceferin, homologë të tij, trajneri Edi Reja, ishtrajnerët De Biazi e Panuçi dhe shumë figura të lidhura me futbollin. "Miqtë e FSHF-së dhe Shqipërisë solidarizohen me ne, në këtë ditë të vështirë! Mora telefonata, mesazhe dhe propozime për ndihmë nga presidenti i UEFA-s”.