"Djalin e topave e doja në festë, por m'u zhduk"

Zhoze Murinjo foli për admirimin e tij për djemtë që mbledhin topat në konferencën për shtyp pas përmbysjes spektakolare të Totenhemit ndaj Olimpiakosit. Një nga djemtë e rinj të "Spërsave" luajti një rol vendimtar në golin e barazimit 2-2 të Herri Kejnit në stadiumin e Totenhemit. Me londinezët që ishin duke u mundur 1-2 nga helenët, djaloshi veproi shpejt gjatë një rivënieje anësore të vendësve, duke i dhënë topin Serzh Oriesë. Mbrojtësi gjeti Lukas Mourën me rivënien e tij dhe braziliani krosoi për Kejnin, i cili barazoi shifrat e një ndeshjeje që anglezët në fund do ta fitonin 42 dhe siguronin biletën në 1/ 8-at pas Bajernit në grupin e tyre. Mou iu afrua, i dha dorën dhe e falënderoi djaloshin dhe më vonë në konferencë tha: "Unë i dua djemtë inteligjentë. Ai e lexoi ndeshjen dhe dha një asist. Unë në moshën 1016 vjeç isha një mbledhës shumë i mirë topash dhe ai ishte i tillë gjithashtu. Ai po lexonte ndeshjen dhe nuk i kishte sytë nga tribunat. Doja ta ftoja në dhomën e zhveshjes për të festuar me lojtarët pas ndeshjes, por ai ishte zhdukur". Tekniku portugez përfitoi nga rasti për t'i kërkuar edhe falje mesfushorit të tij Erik Daier, të cilin e zëvendësoi në minutën e 29-të, për të ndryshuar formacionin e tij me Totenhemin që gjendej në disavantazh të dy golave në shtëpinë e vet përballë grekëve: "Gjëja e parë që dua të them është të them publikisht atë që bëra në dhomën e zhveshjes, që i kërkova ndjesë Erik Daierit. Nuk është kurrë e lehtë për një futbollist, por e bëra për skuadrën. Nuk ishte se Erik po luante keq. Ishte për ekipin, që të kishte zgjidhje të tjera. Më duhej një lojtar i dytë me Dele Alin që të hynte në xhepa dhe për këtë më duhej vetëm një mesfushor shkatërrues, kështu që duhet të zgjidhja mes Daierit dhe Uinksit. Ka të bëjë me skuadrën, jo individin".