Zaniolo "alla" Mesi, por Bashakshehiri i bën presion Romës
Gabriel Zhezus, Florenci dhe Pastore do të jenë mungesat e Romës sot në 18:55 ndaj Bashakshehirit, por Paulo Fonseka rikuperon Mkhitarian dhe Spinacolën. Ky i fundit ka pasur probleme dje në stërvitjen e zhvilluar në Stamboll dhe inatin e ka nxjerrë me terrenin, i cili, sipas anësorit italian, nuk është i përshtatshëm. "Fushë m...", është kapur nga kamerat duke thënë Spinacola. Në Turqi verdhekuqtë do të tentojnë kualifikimin, të ndihmuar edhe nga mbështetja e 500 tifozëve që dje kanë udhëtuar me ekipin drejt kryeqytetit turk.
FONSEKA - Trajneri Fonseka e njeh delikatesën e sfidës dhe në konferencë për shtyp pranoi: "Do të aktivizoj ata që më japin më shumë garanci. Mund të bëj 2-3 ndryshime nga ndeshja e fundjavës, por nuk kam në plan të zëvendësoj të gjithë skuadrën. Mbase do të ishte mirë qoftë edhe një pikë, por duhet të mendojmë sikur na nevojitet vetëm fitorja". Me siguri në fushë do të jetë Nikolo Zaniolo, i cili me 17 driblime të suksesshme renditet pas Leo Mesit në renditjen e dribluesve më të mirë në pesë kampionatet madhore të Europës. ISH-INTERISTI - Humbja e fundit për Bashakshehirin ka qenë ajo ndaj Romës thuajse dy muaj më parë. Që nga ai takim, turqit kanë grumbulluar vetëm rezultate pozitive, por për trajnerin Okan Byryk (me një të kaluar tek Interi) ka ardhur momenti i larjes së hesapeve: "Nuk kemi luksin e llogarive, ndaj të synojmë tri pikët dhe të sigurojmë kualifikimin. Presion do të kemi si ne ashtu edhe Roma, por duhet të shfrytëzojmë fushën dhe tifozët tanë".