“Lu-La” “Lu-La” mrekullon mrekullon Interin, Konte: Barçën e mundim me 80 mijë tifozë
"Lu-La" super, tani mjafton të mundin Barçën për në 1/8-at
Një Inter pa limite! Lukaku dhe dop io-Lautaro, me tre gola së bashku kanë ditur se si të ndezin "tymin" zikaltër në "Eden Arena", njësoj si dritat e një peme Krishtlindjesh, duke qenë se suksesi 3-1 në Çeki jo vetëm që nderon 1000 tifozët e tyre që kishin udhëtuar në këtë transfertë, por në të njëjtën kohë, skuadra e Antonio Kontes tashmë e ka vetë në dorë fatin e kualifikimit. Interi, edhe pse nga mbrëmë ka marrë vendin e dytë në grup, me pikë të barabarta me Dortmundin, kanë nga ana e tyre golavarazhin në ndeshjet direkte (4-3) dhe pas dy javëve do t'u "mjaftojë" që të mundin Barcelonën në "San Siro" për të avancuar më tej. Sigurisht që kjo alternativë vlen duke marrë parasysh se edhe Dortmundi do ta fitojë duelin e fundit ndaj Slavias së Pragës, e cila i ka dhënë lamtumirë Champions-it. PJESA E PARË - Ndoshta ishte edhe meritë e të ftohtit që të dyja skuadrat vendosin ta nisin me gazin në maksimum ndeshjen, ndonëse është Slavia ajo që rrezikon e para, që në minutën e pestë, me një goditje me kokë të Husbauer. Të zotët e shtëpisë janë vërtet të frikshëm, sepse ndoshta nga jashtë mund të duken një skuadër që luan rrëmujë, madje detyron edhe rivalët që të luajnë në këtë mënyrë: janë të pandalshëm, vrapojnë si të marrë në fushë dhe në kundërsulm janë të frikshëm, me lojtarët e Tërpisovskit, që ndërrojnë shpeshherë pozicionet e tyre. Gjithsesi, në të 20-ën, në sulmin e parë real të Interit, italianët godasin me Lautaron, ndonëse ai që bën treçerekun e golit është Lukaku: belgu merr topin, e mbron atë me fizikun prej gjiganti dhe nis me një pasim perfekt argjentinasin, i cili nga brenda zonës nuk mund të gabojë, por feston golin e katërt radhazi në Champions (diçka të tillë e kishin bërë vetëm Eto dhe Krespo). Por Slavia nuk ndalet, madje falë ndihmës së VAR-it e sheh veten që të kalojë nga disavantazhi 2-0, në 1-1. Aksioni thriller në fjalë nis me Lautaron që i rrëmben një top Dridrishit dhe shërben Lukakun, që e dërgon në rrjetë me portën e boshatisur. Por edhe pse arbitri Marcianik akordon fillimisht golin, ai thirret nga VAR-i për të riparë një faull në zonën zikaltër, i cili shihte De Vrajin që të bënte faull në zonë ndaj Peter Olainkës. Kontrollimi ndryshon vendimin: goli i Lukakut anulohet dhe penallti në anën tjetër të fushës për Slavian. Sërish ai që vendos vulën është ish-sulmuesi i Bylisit dhe i Skënderbeut, sepse pas golit që vlejti 11 final në "San Siro", këtë herë rikonfirmohet makth i zikaltërve, duke fituar penalltinë, të cilën kapiteni Souçek e transformon me ftohtësi në gol, duke vendosur shifrat 1-1, me të cilat vuloset edhe pjesa e parë. PJESA E DYTË - Fraksioni i dytë nis me Interin shumë të turbulluar, aq sa çekët nisin ta bombardojnë portën italiane, por Handanoviç vendos të veshë pelerinën e "Supermenit" dhe shmang disavantazhin në të paktën dy raste flagrante: i pari në minutën e 17-të pas një goditjeje të devijuar të Masopust, të cilën portieri zikaltër e dërgon në goditje këndi, por edhe në të 26-ën, Handa hipnotizon sërish Masopustin, pasi ky i fundit i kishte vjedhur një top Valeros. Portieri slloven ishte thjesht magjik, ndonëse në mes të dy aksioneve të Slavias kishte qenë edhe Lukaku që goditi traversën. Trajneri Konte e dinte që kjo ndeshje duhej fituar me çdo kusht dhe hedh edhe Lazaron dhe Espoziton në fushë, aq sa në të 81-ën, ofensiva zikaltër shpërblehet, falë një aksioni kryevepër: Lazaro shërben Lautaron, i cili vendos që të hapë këmbët për të lejuar topin që t'i kalojë poshtë tyre, Frydrish rrëshqet dhe Lukaku djeg në dalje Kolerin për 2-1-shin, duke festuar edhe golin e parë në Ligën e Kampioneve me ngjyrat zikaltër. Por nuk mbaron këtu sepse sërish Lukaku, merr një top në të djathtë dhe gjen në të 88-ën sërish Lautaron në zonë, me argjentinasin që nuk mendohet dy herë po godet saktë në rrjetë. 3-1 dhe tri pikët janë në kasafortë. Çfarë dysheje perfekte, 22 gola së bashku për Lautaron e Lukakun... Madje, do të kishte ardhur edhe i 23ti, me autor belgun, por edhe këtë herë VAR-i anulon, për një tjetër pozicion jashtë loje të Lukakut, ndonëse belgu po festonte me të gjithë skuadrën. Gjithsesi, në këtë rast Interi nuk ka pse nervozohet, pasi misioni i tri pikëve u përmbush me sukses.