Klop 100 ndeshje në Europë: Nuk shkëlqyem, e komplikuam
Ndeshja kundër Napolit ishte e 100-ta për Jyrgen Klopin në Europë. Tekniku gjerman, i cili ka dhuruar mbrëmje të paharrueshme në karrierën e tij me Dortmundin dhe Liverpulin, ia doli ta ngrejë trofeun e Champions-it sezonin e shkuar në Madrid. Por Klop ka përjetuar edhe zhgënjime të mëdha. Ai ka humbur 3 finale, dy në Champions, kundër Bajernit me Dortmundin dhe Realin në stolin e Liverpulit. Kësaj i shtohet edhe finalja e Ligës së Europës humbur me Sevijen. Udhëtimi i tij në Europë nisi në korrik 2005 kur Klop ishte akoma në stolin e Maincit, i cili u kualifikua në Kupën UEFA përmes çmimit të "Fair Play"-t dhe shpërblimi ishte një takim me Mikan e Armenisë. Gjermanët u kualifikuan në raundin pasardhës, ku ata "ngrinë" gjithashtu Keflavikun e Islandës. Shpërblimi ishte një ndeshje kundër Sevijes, por spanjollët ishin një kockë e fortë dhe Mainci u eliminua. Klop mbërriti në Dortmund në verën e 2008-ës, por sezoni i tij i debutimit në Europë përfundoi me një humbje me penallti ndaj Udinezes në raundin e parë të Kupës UEFA. Atij iu desh të priste deri në sezonin 2010-'11, ku Dortmundi u eliminua në fazën e grupeve nga Liga e Europës. Për herë të parë nga 2012-'13 ai e riktheu klubin në Champions, por nuk e kaloi fazën e grupeve. Një vit më vonë, kur marka e futbollit të tij kishte marrë formë dhe me golat e Levës, ata shkuan deri në finalen e "Wembley"-t, por u mposhtën nga Bajerni. Një eliminim në çerekfinale në 2013-'14 dhe dështimi për të kaluar përtej 1/8-ave, ishin rezultatet e fundit në Dortmund. Te Liverpuli historia ndryshoi. Më pak se një vit në stol dhe "reds"-at fluturuan në finalen e Ligës së Europës, por në fund Sevija i përmbysi 3-1. Mungesa në Europë në 2016-'17 e ndihmoi ekipin të mblidhte forcat dhe rikthehej në Champions në javën e fundit të kampionatit, duke e mbyllur në vend të katërt. Ardhjet e Van Dajkut dhe Salahut e forcuan skuadrën dhe u arrit finalja e parë në Kiev e humbur ndaj Realit edhe prej gafave të portierit Karius. Por në qershor ai ia doli të kurorëzohej kampion Europe. Klop e nisi këtë sezon duke fituar finalen e tij të pestë europiane, kundër Çelsit në Superkupën e Europës. Dy fitoret e tij më të thella i ka regjistruar në stolin e Liverpulit, 7-0 në 2016-'17 kundër Spartakut të Moskës dhe Mariborit në 2017-'18. Humbjet më të thella janë katër 3-0: ndaj Barcelonës me Liverpulin, Juves me Dortmundin, Realit dhe Marsejës. Kundër Realit dhe Sevijes ai është ndeshur më shpesh, 7 herë. Rekordin më të mirë e ka ndaj Sitit dhe Realit, duke u rrëmbyer 3 fitore. Sa u përket trajnerëve, Venger dhe Ançeloti janë kundërshtarët me të cilët është përballur më shpesh: 6 herë. NDESHJA - "Napoli mendon se është kualifikuar dhe ndoshta e kanë bërë me këtë rezultat. Këtu te ne mendojnë se do të jetë e vështirë. Dhe kjo është e vërtetë. Nuk i shfrytëzuam rastet tona. Nëse do të kishim fituar këtu, nuk do të na duhej që të shkonim në Salcburg në këtë situatë. Por do provojmë të fitojmë atje. Nuk shkëlqyem, por i vumë nën presion. Problemi më i madh është dëmtimi i Fabinjos. Shpresojmë që të mos jetë shumë serioz, por ka shumë dhimbje rreth kaviljes", tha Klop në fund të ndeshjes.