Pa zbarkuar ende, Zlatan Ibrahimoviçi i kërkon Milanit rritje rroge
Suedezi do 1 milionë euro më shumë, Flamengo gati të konkurrojë kuqezinjtë
Zlatan Ibrahimoviç është një nga emrat më të diskutuar kohët e fundit, për shkak se vendosi të largohet nga amerikanët e Los Anxheles Galaksi. Suedezi tashmë është në kërkim të një skuadre të re për të vazhduar karrierën dhe interesimet në drejtim të tij nuk mungojnë. Prej kohësh Milani dhe Bolonja kanë nisur kontaktet me futbollistin dhe agjentin e tij, për të arritur një marrëveshje ta marrin në ekipet e tyre respektive. Shumë shpejt 38-vjeçari pritet të marrë vendimin për sa i përket të ardhmes së tij, ku do të përcaktojë edhe skuadrën e tij për gjysmën e sezonit aktual. Në pozicion të favorshëm është Milani, me drejtuesit e klubit që kanë avancuar në bisedimet.Por me sa duket, 6 milionë eurot e ofruara nga "Djalli" për 18 muajt e ardhshëm nuk mjaftojnë. Sipas mediave italiane, Ibra pretendon 3 milionë euro për gjashtë muajt e ardhshëm. Në fund të kësaj periudhe, në varësi edhe të arritjes së objektivave sezonalë, suedezi kërkon një tjetër diskutim financiar për sezonin 2020-'21. Afrimi i tij ka marrë bekimin e pronarëve të Milanit, me fondin "Elliott" që duket gati të financojë operacionin. Përgjigja përfundimtare do të bëhet e ditur javën e ardhshme dhe nëse do të jetë pozitive, sulmuesi pritet të zbarkojë te Milani në mesin e dhjetorit. Për të thuhet se ka edhe një plan stërvitje 14-ditor, në mënyrë që të gjejë formën e duhur fizike dhe të përshpejtohet ambientimi i tij me grupin e drejtuar nga Stefano Pioli. KONKURRENCA - Nga një personazh si Ibrahimoviç mund të presësh gjithçka. Megjithëse Milani pret përgjigje pozitive, Flamengo mund ta shtangë. Klubi brazilian pas shpalljes kampion i Kupës Libertadores ka kërkuar shërbimet e suedezit duke filluar që nga Botërori për klube që do të nisë pas pak ditësh. Përvoja latine është sugjestionuese, por vështirë se do të rezultojë mjaftueshëm joshëse për gjigantin nga Malmo, i cili duket i orientuar drejt Serisë A, ku përveç "Djallit", do ta mirëprisnin edhe klube si Napoli i Ançelotit apo Bolonja ku trajneri Mihajloviç lobon prej kohësh për të pasur suedezin nën urdhrat e tij që në merkaton e janarit.