Grezda kthehet tek Osijeku, ofertë 500 mijë € për Baren
Merr 80 mijë euro në vit, por mund të evitojë krizën e klubit
Keidi Bare mund të jetë shpëtimi i Malagës. Klubi spanjoll është përfshirë prej muajsh nga një krizë financiare dhe do të detyrohet të heqë dorë nga lojtarë të rëndësishëm për të evituar masat që mund të merren nga Federata e Spanjës. Mediat në këtë vend kanë raportuar së fundmi se një prej titullarëve që pritet të sakrifikohet është pikërisht mesfushori i Kombëtares shqiptare, i cili këtë sezon ka shkëlqyer me Malagën në Segunda Divizion. Klubi që kërkon shërbimet e Bares dhe po insiston më tepër për të bindur palët është gjithashtu në ligën ku militon Malaga. Bëhet fjalë për skuadrën e Rajo Vajekanos, që pozicionohet në vendin e 12-të. Sipas asaj që raportojnë mediat spanjolle, Vajekano është gati të paguajë deri në 500 mijë euro për Baren. Kjo ofertë tundon jo pak klubin e Malagës, por gjithsesi këta të fundit janë të interesuar për të kapur një shifër më të madhe.
Për Baren ka interesim edhe nga një klub me emër në La Liga, pikërisht Real Vajadolid, që është në pronësi të "Fenomenit" brazilian (Luiz Nazario Da Lima). Politika e klubit të Ronaldos është të afrojë të rinj të talentuar, prandaj dhe Bare është pikasur si një prej atyre që po vëzhgohet nga drejtuesit e Vajadolid. Gazetat iberike kanë folur për një interesim të spanjollëve, por pa dhënë detaje konkrete si në rastin e Vajekanos, që ka ofruar 500 mijë euro. Largimi i Bares mund të sjellë jo vetëm të ardhura për Malagën, por njëkohësisht do t'i hapte rrugën edhe transferimit të mesfushorit të njohur italian, Daniele De Rosit, i cili pas largimit nga Boka Zhunior synohet nga spanjollët.
Pagë e ulët te Malaga
Bare i kushton më pak nga të gjithë titullarët klubit të Malagës, por ka një vlerë të madhe në treg, pasi është një nga lojtarët e rinj më të kërkuar që kanë spanjollët aktualisht në ekip. Sipas shifrave
zyrtare në Spanjë, paga sezonale e mesfushorit kuqezi shkon 80 mijë euro, një shifër modeste kur bëhet fjalë për nivelin e kampionatit ku bën pjesë. Gjithsesi, e sigurt është se lojtari këtë vit do të përfitojë një kontratë disa herë më të majme.