Vllaznia, 20 milionë lekë për një mbrojtës

Shkupjani flet si shkodran: Erdha në një klub me traditë 100-vjeçare, Jonuz do më ndihmojë

Vllaznia nis merka ton, merr Mevlan Adilin për qendërmbrojtjen. Klubi ka nxituar të plotësojë një nga kërkesat e Mirsad Jonuz dhe në listën e tij ishte edhe 25-vjeçari nga Shkupi. Bëhet fjalë për një lojtar që trajneri e njeh mirë, derisa ka luajtur me disa skuadra në Maqedoninë e Veriut (me Shkëndijën e Tetovës dhe Shkupin konkretisht). Marrëveshja është 1vjeçare, pra i skadon në dhjetorin e 2020-ës. Gazeta "Panorama Sport" mëson se qendërmbrojtësi do të përfitojë afro 20 milionë lekë të vjetër gjatë kohëzgjatjes së kontratës. Këtë shumë drejtuesit e kanë akorduar për të gjithë futbollistët që vijnë nga jashtë territorit të Shqipërisë dhe duket se me të njëjtin standard kanë vepruar edhe me afrimin e parë të janarit. Historia me përforcimet nuk do të mbyllet këtu, pasi ky është vetëm emri i parë i sugjeruar prej teknikut maqedonas. Ai pret edhe tri afrime të tjera, konkretisht një mesfushor organizator dhe dy sulmues cilësorë.

KLUBI

Ka qenë vetë klubi që e ka prezantuar blerjen e parë, ndërsa në faqen zyrtare shkruante: "Kërkesat e stafit teknik për përforcime kanë vënë në lëvizje drejtuesit e

klubit dhe mesditën e sotme (djeshme) ata kanë arritur akordin me futbollistin e parë. Bëhet fjalë për mbrojtësin shqiptar të Maqedonisë së Veriut Mevlan Adili. Lojtari në fjalë ka firmosur për klubin tonë dhe do të jetë pjesë e Vllaznisë për një

periudhë njëvjeçare. Ai luan në rolin e qendërmbrojtësit dhe karriera e tij ka kaluar përmes ekipeve të Shkupit dhe Shkëndijës së Tetovës ndërkohë që ka pasur edhe dy eksperienca jashtë vendit, pikërisht në Rumani me UTA Arad dhe në Lituani

me Zalgiris. Me marrjen e këtij futbollisti, shpresojmë që reparti i mbrojtjes tashmë të jetë i plotësuar në organikë".

DEKLARATA

Mevlan Adili dje u prezantua, ndërsa prej të mërkurës do të niset bashkë me ekipin

për në Ohër. Shkupjani ka thënë edhe fjalët e tij të para si futbollist i kuqebluve, duke shpalosur edhe objektivat. "Zgjodha Vllazninë, sepse më pëlqen si klub dhe ka një traditë 100-vjeçare. Përpos kësaj, kushtet që m'u ofruan ishin të mira dhe për rrjedhojë arritëm këtë marrëveshje me sukses. Fakti që trajner do të kem Mirsad Jonuz, që është shumë i njohur në vendin tonë, ngaqë ka qenë edhe trajner i kombëtares së Maqedonisë, besoj se do të më ndihmojë që të ambientohem sa më shpejt me ekipin dhe të jap më të mirën për të. Me Vllazninë dëshiroj

të arrij objektivat e klubit në radhë të parë dhe e dyta, t'u dëshmoj drejtuesve të klubit se nuk kanë gabuar që më besuan", kështu shprehej 25vjeçari gjatë deklaratës së dhënë në faqen zyrtare të klubit. Me afrimin e tij shtohet konkurrenca në qendër të mbrojtjes, ndërsa kujtojmë se në gatishmëri janë emra si Renato Malota dhe Dajan Shehi. Duhet saktësuar se Mevlan Adili luan edhe si mbrojtës i djathtë dhe para defensivës, ndaj për Mirsad Jonuz do të jetë një "xhol" i mirëfilltë në rast dëmtimesh apo pezullimesh.