Oto Xhon ikën nga Korça, gati transferimi te Prishtina

Skënderbeu mban 20 % të kartonit të nigerianit

Oto Xhon është largimi i parë zyrtar nga Skënderbeu për pjesën e mbetur të sezonit. Ashtu sikundër pritej të ndodhte, bardhekuqtë janë limituar për të dhënë letrat e futbollistit nigerian, i cili nuk është se tregoi vlera të mëdha me fanellën e Skënderbeut. I ardhur në Korçë si një futbollist që do të bënte diferencën në sulm, duke spostuar Guindon në repartin ofensiv të Skënderbeut, pritshmëritë për Oto Xhon ishin të mëdha. Por, pas një sezoni e gjysmë në radhët e Skënderbeut, mbyllet aventura e tij në Korçë. Trajneri Ilir Daja prej kohësh e kishte nxjerrë jashtë planeve afrikanin dhe klubit i kishte vënë ultimatumin që në këtë hapësirë merkatoje të afronte një emër tjetër në repartin sulmues. I ndodhur në një situatë të tillë për Oto Xhon çdo sistemim tjetër do të kishte vlerë. Interesi që vinte nga Kosova ishte i madh dhe normalisht që kjo përbënte hapësirën e duhur për Skënderbeun. Në garë ishin Drita e Gjilanit dhe Prishtina, por duket se oferta e skuadrës së kryeqytetit kosovar ka bindur bardhekuqtë. Akordi duket se është arritur mes palëve dhe mbeten vetëm disa detaje në kontratë për t'u diskutuar. Nga sa bëhet me dije nga burimet pranë klubit, drejtuesit e Skënderbeut dhe të Prishtinës po diskutojnë rreth përqindjes së kartonit të futbollistit. Në kampin kosovar janë të gatshëm të derdhin në arkat e Skënderbeut rreth 120 mijë euro për të mbyllur me sukses bisedimet, ndërsa në Korçë kërkojnë të mbajnë edhe 20% të kartonit të sulmuesit. Një manovër kjo që ka rezultuar e suksesshme më herët. Në kushte të tilla, pritet që gjithçka të finalizohet sot. Nga ana tjetër, Prishtina ka arritur marrëveshjen me sulmuesin e Skënderbeut. Ai do të rikthehet në kampionatin kosovar, teksa më herët ka mbajtur veshur fanellën e Trepçës '89, ku realizoi 25 gola me fanellën e skuadrës nga Mitrovica në sezonin 2016-2017. Oto Xhon pritet të prezantohet te Prishtina në ditët në vijim për të nisur kështu zyrtarisht aventurën

me bardhekaltrit në Superligën Kosovare.

E konfirmon edhe Dallku - Kalimin e Oto Xhonit te Prishtina e konfirmon edhe trajneri i kësaj skuadre, ish-mbrojtësi i Kombëtares shqiptare, Armend Dallku. "Ne si staf nuk kemi pasur pushim fare dhe kemi insistuar të gjejmë përforcimet e duhura, sidomos në pjesën ofensive aty ku kemi çaluar më së shumti. Pra, kemi kërkuar lojtarin e përshtatshëm,

jo vetëm në filozofinë tonë të lojës, por edhe që e njeh kampionatin tonë dhe jo të gjejmë dikë që do të na merrte kohë deri në adaptim. Pra, nuk dua lojtarë të panjohur apo që nuk i njeh rrethanat e futbollit kosovar. Besoj se do t'ia arrijmë të sjellim atë që kemi dashur dhe mund të konfirmoj se jemi afër pothuajse 95% me Oto Xhon", u shpreh dje Armend Dallku për mediat kosovare.