Lushnja firmos me mbrojtësin Lundraxhiu
Trajneri Gjyla siguron lojtarin që do zëvendësojë Ibrahimllarin
Pas pushimeve te dimrit, lushnjarët zbritën dje pasdite në fushë, ku zhvilluan seancën e parë stërvitore për vitin 2020. Vetëm për pak ditë verdhejeshilët do të stërviten në kushtet e shtëpisë, pasi më pas është planifikuar një minifazë përgatitore në kushte më komode. Për këtë drejtuesit lushnjarë po nxitojnë, pasi kampionati do të rifillojë më 25 janar. Një gjë të tillë e pohoi për gazetën "Panorama Sport" sekretari i klubit, Edison Koçi, i cili u shpreh: "Skuadra rifilloi stërvitjen, por shumë shpejt do t'i vijojë përgatitjet në kushte grumbullimi. Kemi marrë konfirmimin që kampionati do të rifillojë më 25 janar dhe skuadra duhet të jetë gati në kohën e duhur".
LUNDRAXHIU - Klubi lushnjar ka bërë lëvizjet e para në merkaton e dimrit. Pas Brunild Pepës, i konfirmuar nga trajneri Gjyla për vazhdimësinë e sezonit, është afruar dje edhe qendërmbrojtësi peqinas, Emiljan Lundraxhiu. Mbrojtësi 25-vjeçar ka luajtur më parë me Shkumbinin, Gramshin, Tomorin dhe Erzenin.
Më pas është larguar për në Gjermani, ku është aktivizuar fillimisht me Vatan Sport dhe më pas me Bremerhaven. Mbrojtësi peqinas do t'i rikthehet kështu kampionatit tonë me fanellën e Lushnjës, që kishte nevojë për një lojtar me përvojë për qendrën e repartit të prapavijës, pas largimit të Ibrahimllarit. Pasi ka zhvilluar seancën e parë me skuadrën e trajnerit Gjyla, Lundraxhiu ka firmosur kontratën deri në fund të sezonit në zyrën e sekretarit Edison Koçi. "Lundraxhiu është zyrtarisht lojtar i Lushnjës", tha Koçi për gazetën, ndërsa qendërmbrojtësi peqinas u shpreh: "Kam rënë dakord me drejtuesit e Lushnjës dhe kam firmosur. Shpresoj të na shkojë mbarë. Lushnja është një skuadër me pretendime të mëdha dhe besoj se do të jetë një eksperiencë e mirë për mua. Jam i kënaqur që do të jem pjesë e kësaj skuadre dhe besoj se do t'i realizojmë objektivat e sezonit për ngjitjen në Superiore". Verdhejeshilët fuqizojnë mbrojtjen dhe sulmin me Lundraxhiun dhe Pepën, por ditët në vazhdim mund të ketë edhe ndonjë afrim të fundit.