Kristiano: I bëjmë presion Interit
"Jemi përmirësuar në të gjitha aspektet, skuadra vjen përpara golave të mi"
Asnjë lojtar tjetër nuk ka shënuar më shumë tregolësha në kampionat që nga janari i vitit 2008 sesa Kristiano Ronaldo. Mjafton një statistikë e tillë për të kuptuar madhështinë e këtij futbollisti, i cili edhe pse në moshën 34-vjeçare vazhdon të mahnitë të gjithë botën. Kur ndaj tij ngrihen pikëpyetje, ai është gjithmonë aty duke u përgjigjur në fushën e lojës me gola. I djeshmi ishte "hat trick"-u i 36-të në kampionat që nga janari duke lënë pas Leo Mesin, i cili është ndalur në kuotën e 34 tregolëshave. Për portugezin ishte i pari në kampionatin italian dhe i dyti në total me fanellën e Juventusit, pas atij të shënuar kundër Atletikos së Madridit sezonin e kaluar në Ligën e Kampioneve. Kaljari ishte "viktima" e fundit që kishte arritur të mbijetonte nga skuadrat e Serisë A, ndaj të cilave Kristiano Kishte luajtur të paktën një herë dhe nuk i kishte shënuar. Ja që pësoi 3 gola... Golat e shënuar ditën e djeshme shërbyen për të thyer një tjetër rekord të vogël me fanellën bardhezi, pasi ishte hera e parë që Kristiano Ronaldo shënon në 5 ndeshje radhazi në Serinë A. Kjo ishte mënyra më e mirë për të harruar finalen e humbur në Superkupë
kundër Lacios.
PRESION INTERIT - Sulmuesi i Juventusit ka treguar emocionet e tij pas fitores ndaj Kaljarit dhe thotë se e rëndësishme ishte fitorja dhe jo golat e shënuar. "Gjëja më e rëndësishme është skuadra dhe skuadra luajti shumë
mirë. Sigurisht që mua më pëlqen shumë të shënoj, por e rëndësishme është që të fitonim dhe ne ia dolëm. Në këtë mënyrë i bëjmë presion Interit dhe shohim vetëm përpara. Duhet të jemi të qetë dhe të mendojmë vetëm për veten tonë", tha fillimisht Kristiano.
Ai foli gjithashtu edhe për përmirësimin që ka pësuar ekipi në fazën mbrojtëse. "Jemi përmirësuar hap pas hapi dhe ndeshje pas ndeshjeje, jo vetëm në mbrojtje, por edhe në sulm dhe mesfushë. Duhet të përmirësohemi në të gjitha aspektet dhe jo vetëm në një. Ishte mënyra më e mirë për ta nisur vitin dhe tani të vazhdojmë të punojmë sepse rruga është e gjatë dhe kampionati gjithashtu. Ekipi më pëlqeu shumë dhe treguam formë të mirë", tha Kristiano Ronaldo pas fitores 4-0 të Juventusit kundër Kajlarit.