Solskjaer: E admiroj Pepin, ka ngritur stekën. Në derbi nuk vendos forma
Trajneri i Junajtidit, optimist përpara gjysmëfinales së Kupës
Është një Ole Gunar Solskjaer i karikuar dhe plot elozhe për rivalin e tij të sotëm Pep Guardiola ai që shfaqet në konferencën për shtyp të Junajtidit përpara gjysmëfinales së parë të Kupës së Anglisë. "Është një derbi, ka lidhje me adrenalinën dhe atmosferën. Unë e admiroj Pepin. Ata e kanë rritur stekën aq shumë, sa na shërben si një objektiv për ta arritur. Ata fitojnë ndeshje njëra pas tjetrës dhe kanë vetëbesim. Por, në një derbi forma nuk ka rëndësi", u shpreh tekniku norvegjez i Junajtidit. Solskjaer ka edhe një mesazh për Lingardin, klientin më të fundit të Mino Raiolës, i cili nuk shënoi asnjë gol gjatë vitit të fundit: "Xhesi ka pasur ulje-ngritjet e tij. Ne duam që ai të shënojë dhe të shërbejë, por askush nuk vrapon sa ai. Ka ulur kohën e përdorimit të rrjeteve sociale dhe duhet ta ulë kokën dhe të punojë".
Statistikat - Mançester Junajtid e ka mposhtur Sitin në përballjen e fundit mes tyre në Premier Ligë muajin e shkuar. Por, "Djajtë" nuk kanë fituar dy ndeshje radhazi ndaj rivalëve të qytetit që prej prillit 2010. Junajtid e ka eliminuar Sitin në secilën prej dy takimeve të fundit në Kupën e Ligës, duke i nxjerrë jashtë kompeticionit në gjysmëfinalen e 2009-'10 dhe raundin e katërt në 2016-'17. Që kur humbi 1-0 me
Junajtidin në raundin e katërt në tetor 2016, Siti është i pamposhtur në 15 ndeshjet e Kupës së Ligës (11 fitore, 4 barazime). Skuadra e fundit që ka pasur një seri më të gjatë rezultatesh pozitive në këtë kompeticion ishte Çelsi (20042008, 18 ndeshje). Kjo do të jetë gjysmëfinalja e 15-të në historinë e Kupës së Ligës për Junajtidin. Vetëm Liverpuli (17) ka regjistruar më shumë prezenca në këtë fazë. Rashford është përfshirë në 8 gola në 5 ndeshjet e tij të fundit në Kupën e Ligës (5 gola, 3 asiste). Këtë sezon ai ka shënuar 3 gola. Që prej nisjes së sezonit 2013-'14, Sterling është përfshirë në më shumë gola në Kupën e Ligës se çdo futbollist tjetër: 14; 8 gola, 6 asiste.