Kritikat e Vatës, Lila: Gabuam se jemi të rinj
Kreu i Sindikatës së Futbollistëve: Ju tregoj si e bëmë përzgjedhjen
Një ditë pasi ish-kapiteni Rudi Vata deklaroi për "Panorama Sport" se listën e miqësores së yjeve e kanë bërë qokaxhinjtë, ka ardhur edhe reagimi i presidentit të Sindikatës së Futbollistëve, Andi Lila. Ky i fundit është një ndër nismëtarët e aktivitetit që do të organizohet këtë të premte në stadiumin "Air Albania" mes yjeve të Shqipërisë, Italisë, Turqisë dhe Greqisë. "Rudi Vata është një emër shumë i madh. Kush jam unë që të vlerësoj apo ul vlerat Rudit...? Ndoshta nuk kemi eksperiencën e duhur dhe kemi gabuar. Kështu e kemi menduar këtë herë. Në ndeshjet e tjera, patjetër që do të jenë prezent. Kjo nuk është punë qokash. Këtë listë e bëri kryesia e shoqatës që drejtoj. Mund të kishim thirrur edhe Ansi Agollin, edhe ai e meritonte. Unë kam shumë respekt për Rudin. Nuk mund t'ia heqim kontributin që ka dhënë për futbollin. Është njeri i madh, e pranoj që kemi bërë dhe gabime. Kjo është një ndeshje për kauzë të madhe. Janë mbi 100 futbollistë veteranë që e meritonin të gjithë të ishin këtë ndeshje. Bëmë seleksionim të tillë. Ne jemi sindikatë e re, nuk kemi shumë eksperiencë", deklaroi
Lila i ftuar dje në emisionin "Procesi Sportiv" në "Top Channel". Krahas Vatës që nuk ka marrë një ftesë për të qenë në këtë miqësore bamirësie mes 20 lojtarëve që kanë kontribuar për Kombëtaren në vitet '90-2000, jashtë kanë mbetur edhe emra të njohur si Altin Haxhi, Arian Xhumba, Fatmir Vata, Edmond Kapllani etj.
SAKRIFICA E HASIT
Lila tregoi disa detaje të organizimit që po bën në prag të miqësores së yjeve. "Të konfirmuar nga Kombëtarja jonë janë 20 ish-futbollistë. Zgjodhëm trajner Ilir Shulkun, të cilin e kam pasur trajner te Besa e Kavajës. I kam thënë që të linte edhe mustaqet që ka pasur dikur, për ta sjellë më shumë tifozë në stadium. Kriteri ishte që të kishim një skuadër nga të gjitha trojet. Besnik Hasi po bën një sakrificë të jashtëzakonshme. Do të vijë më 10 janar, do të luajë ndeshjen e parë dhe do të niset direkt për në Arabi, që të kapë takimin që ka me skuadrën arabe, të cilën ai drejton. Të ardhurat e biletave janë simbolike. Gjithsecili duhet të vijë ta shijojë këtë ndeshje. Lekët do të bëhen transparente kur të ndahen", përfundoi lojtari i Tiranës.