Kobi-Vanesa, pakt për të mos udhëtuar kurrë bashkë
Ishte në meshë para përplasjes, rikuperohen edhe 9 kufomat
Kobi Brajant dhe bashkëshortja e tij Vanesa kishin një pakt së bashku, që nuk duhej thyer kurrë: Asnjëherë nuk do të udhëtonin të dy njëkohësisht me helikopterin e familjes. Dhe arsyeja kuptohet qartë, ndonëse fati i keq deshi që aksidenti tragjik jo vetëm që ndodhi, por i mori jetën legjendës së NBA-së dhe vajzës së tij 13vjeçare, Xhana Maria, plus 7 personave të tjerë në bord. Lajmin që qarkulloi dje, atë të paktit mes Kobit dhe Vanesës, e solli një burim pranë familjes në faqet e revistës “People”, duke shtuar gjithashtu se ishylli i NBA-së kërkonte gjithmonë që të fluturonte vetëm me pilotin e tij të besuar, armenin Ara Zobajan (pilot 50-vjeçar), edhe ai mbetur i vdekur pas përplasjes në një nga kodrat kaliforniane. Fatmirësisht,
Vanesa e kishte ndjekur dhe pranuar gjithmonë paktin e bashkëshortit të saj, edhe pse diçka e tillë nuk ishte menduar asnjëherë që të ndodhte, një fluturim pa kthim, i cili përveç Kobit, bëri që të ndërronte jetë edhe vajza e tij e talentuar dhe pasardhësja e “Mambës së Zi” në basketboll.
“Kisha mbetur shumë gjatë i bllokuar në trafik, aq sa humba një recital në shkollë të njërës prej vajzave të mia, - tregonte Kobi Brajant, në një intervistë në vitin 2018, i pyetur për arsyen pse kishte zgjedhur të udhëtonte me helikopter brenda Los Anxhelesit. – Prandaj, mendova se për të mos humbur më asnjë shfaqje apo aktivitet të vajzave të mia, për të mos u bërë kurrë vonë në stërvitje dhe për t’u kthyer sa më shpejt pranë familjes sime, por mbi të gjitha për të mos u stresuar përpara stërvitjeve apo pas ndeshjeve nga trafiku i rënduar, bleva një helikopter, pasi në ajër nuk ka trafik”. Por kjo
zgjedhje në dukje efikase dhe që një njeri shumë i pasur si Kobi Brajant (pasuria e tij mendohet të jetë afro 500 milionë dollarë) mund t’ia lejonte vetes, i kushtoi shtrenjtë, shumë shtrenjtë madje...
PËRPLASJA
PAS MESHËS
Dhe ta mendosh që 41vjeçari Kobi dhe 13-vjeçarja Xhana ishin zgjuar shumë herët atë ditë për të shkuar si çdo fundjavë në kishë, pas së cilës kishin marrë edhe kungimin... Sepse siç konfirmohet, edhe pse kjo dihej prej vitesh, Brajant ishte një besimtar katolik që e dashuronte fenë e tij. Por pikërisht pas meshës, babë e bijë, së bashku me 7 personat e tjerë, hipën në bord të mjetit ajror S-76 Sikorski, i cili fatkeqësisht do ta prekte tokën me 294 kilometra në orë dhe do të shpërthente.
RIKUPEROHEN KUFOMAT
Lajmet e ditës së djeshme
nga kodra kaliforniane folën fillimisht për 3 trupa të rikuperuar, 3 kufoma të cilat nuk ishin identifikuar, deri në orët e para të mëngjesit të djeshëm, por pak pas mesditës, mjeku ligjor i kontesë së Los Anxhelesit, Xhonatan Lukas, ka konfirmuar se të nënta kufomat janë rikuperuar. Ndërsa Xhenifer Homendi, përgjegjësja e “Transportation Safety Board”, e cila po investigon mbi çështjen, ka nënvizuar se pjesët e helikopterit ishin shpërndarë në një rreze shumë të gjerë: “Një pjesë e bishtit të helikopterit është gjetur në njërën pjesë të kodrës, ndërsa helika në anën tjetër të saj, ndërkohë që motori ka fluturuar 5-600 metra larg vendit të shpërthimit”. Dhe të gjitha këto bënë që edhe gjetja e trupave të vështirësohej. Ndërkohë, edhe për funeralet, nuk ka ende një datë të caktuar.