Prezantohet “maestro”, Eriksen: Gati për sfidë
"Interi është klub i madh, jam i lumtur që ndodhem këtu"
Le të ngrihet sipari dhe të fillojë shfaq ja. "Maestro" Eriksen prezantohet në teatrin "La Scala". Interi zgjedh të bëjë një zyrtarizim teatral për mesfushorin danez, të cilin e mori nga Totenhemi për 20 milionë euro. Fillimisht në teatrin e vërtetë dhe më pas në teatrin e futbollit "San Siro". Tifozët e Interit po prisnin me padurim zyrtarizimin dhe ai erdhi në drekën e djeshme, duke i bërë më të lumtur se kurrë. Pak festë në këtë moment negativ ku skuadra e Antonio Kontes ka marrë 3 barazime radhazi. Tani trajneri italian do të ketë në ekip "gjeniun" që do të sjellë gola, asiste, gjeometri, elegancë dhe teknikë. Një nga telenovelat më të gjata të merkatos së dimrit përfundoi. Paraditen e djeshme, mesfushori danez ishte në zyrat e klubit për të firmosur kontratën dhe pasdite doli në stërvitje nën urdhrat e Antonio Kontes. Klubi shpërndau fotot e para dhe ai qëndronte pranë lojtarëve të Premier Ligës si Jang dhe Lukaku. Sipas "Sky"it, mund të jetë i grumbulluar që për sfidën e sotme kundër Fiorentinës, por do të vendosë trajneri italian për këtë gjë. Kristian Eriksen ka zgjedhur fanellën me numrin 24 në ekipin zikaltër.
Sfidë e re - Në fjalët e tij të para si lojtar i Interit, mesfushori danez nuk i fshehu emocionet për sfidën e re që do të nisë me italianët dhe mundësinë për të luajtur në një kampionat si Seria A. 27-vjeçari thotë se po pret me padurim momentin për të zbritur në fushë dhe për të njohur nga afër tifozët e Interit. "Kanë qenë javë shumë të gjata dhe pritja ka qenë shumë e madhe. Më në fund jam këtu dhe shumë i lumtur që do të mbaj veshur fanellën e Interit. Jam shumë i emocionuar dhe po pres me padurim orën për të njohur tifozët dhe për t'i takuar ata. Kam pasur mundësinë që të takoj disa prej tyre dhe pritja ka qenë shumë e ngrohtë. Ndihem shumë mirë këtu", tha fillimisht Eriksen. Më tej ai foli për ecurinë fantastike që ka pasur në kampionatin anglez dhe shpreh besimin që do të bëjë të njëjtën gjë me ekipin e Interit. Ai ka dhënë 60 asiste dhe ka shënuar 50 gola, por thotë se nuk i pëlqejnë shumë statistikat. "Nuk jam nga ata njerëz që mahniten pas statistikave, por e di që ato u pëlqejnë shumë njerëzve. E thonë që unë kam bërë mirë në Angli, por tani kisha nevojë për një tjetër sfidë në karrierën time. Jam i lumtur që mund të luaj në Serinë A dhe në një klub të madh dhe fantastik si Interi", theksoi danezi. Nuk munguan fjalët e para për trajnerin Antonio Konte dhe besimi që bashkë do të ndihen mjaft mirë. "Sigurisht që kam pasur mundësinë ta njoh kur unë isha te Totenhemi dhe përballeshim me Çelsin. Ishte shumë e vështirë të luaje ndaj skuadrës së tij. Mundësia për të njohur dhe për të mësuar se si luajnë skuadrat e tij më entuziazmon shumë", përfundoi mesfushori i ri i Interit. Nuk është koha për fjalë, por për vepra. Muzikë "maestro"!