E bujshme, Kumbulla drejt Napolit për 24 mln euro
Napolitanët me treshe shqiptare në verë, në vijim marrëveshja e plotë
Elseid Hysaj, Amir Rrahmani dhe Ma rash Kumbulla, bashkë në një skuadër. Mbrojtja e Napolit do të flasë shqip më shumë se kurrë. Eduardo Reja apo Xhani De Biazi trajnerë? Jo, aspak! Napolitanët po projektojnë një skuadër në dispozicion të Xhenaro Gatuzos. Së fundmi, në Itali është bërë me dije se Napoli dhe Verona kanë gjetur një tjetër akord shumëmilionësh. Marash Kumbulla do të jetë i Napolit për një shifër prej 24 milionë eurosh. "Gianlucadimarzio.com" raporton se bëhet fjalë për një marrëveshje të ngjashme si ajo që të dyja klubet nënshkruan për Amir Rrahmanin.
Akordi
"Interi, shumë pranë". "E do Lacio e Tares". "Juventus, Dortmund, Çelsi e Mançester Junajtid e ndjekin në stadium". Të gjitha të vërteta dhe tituj bombastikë lajmesh nga përtej detit në Itali, por Napoli është treguar i gatshëm të plotësojë oreksin e Veronës. 24 milionë euro në arkat e klubit dhe mundësinë që shqiptari të jetë i huazuar deri në fund të këtij sezoni në skuadrën veroneze. Ky është pakti që raportohet të ketë arritur drejtori i Napolit me drejtuesit e Veronës për shërbimet e qendërmbrojtësit 19vjeçar. Marash Kumbulla është duke bërë një sezon fantastik, edhe pse është vetëm i pari në karrierën e tij në elitën e futbollit italian.
Marrëveshja e plotë
Sipas raportimeve në mediat italiane, pas këtij akordi verbal mes Napolit dhe Veronës, pritet që në ditët në vijim të ketë një tjetër takim mes palëve, duke përfshirë edhe agjentin e lojtarit dhe vetë futbollistin që do të kenë mundësinë të njihen me projektin sportiv, atë ekonomik dhe që të nënshkruajnë marrëveshjen e plotë me të gjitha detajet. Pasi të mundësohet një transferim i tillë, Napoli në verë pritet që të ketë tre shqiptarë në prapavijë: Elseid Hysaj në të djathtë dhe dyshen Amir Rrahmani dhe Marash Kumbulla në qendër të mbrojtjes.
Karriera
Marash Kumbulla në sezonin e shkuar ka luajtur vetëm 16 minuta me skuadrën e Veronës. Edhe pse në Serinë B, kjo e fundit nuk kishte hapësira për shqiptarin, por habia e madhe është që sapo nisi edicioni i veronezëve në Serinë A, shqiptari bind gjithkënd dhe e gjen veten mes titullarëve. 19 vjeç, shënon edhe një gol dhe luan titullar sa herë është në dispozicion të trajnerit. Paraqitje bindëse si prej veterani.