Boateng-Gorecka, plas grushti te Bajerni i Mynihut
Flik rregullon gjithçka, Leon: Futbolli është emocion, gjëra që ndodhin
Zherom Boateng dhe Leon Gorecka u përplasën fizikisht me njëri-tjetrin gjatë një ndeshjeje kontrolli brenda skuadrës, në fushën stërvitore të kampionëve të Gjermanisë. Pas një ndërhyrjeje të Goreckës ndaj Boatengut, ky i fundit mësohet t'i ketë vënë dorën në fytyrë mesfushorit. Këtu ka ndodhur edhe përplasja e madhe, pasi Goreckës nuk i ka pëlqyer kjo gjë duke iu kundërpërgjigjur me të njëjtën mënyrë. Për të mos lejuar degjenerimin e situatës është dashur ndërhyrja e Tomas Mylerit, por edhe të trajnerit Hansi Flik që i ka urdhëruar të dy lojtarët të largohen menjëherë nga fusha e stërvitjes. Por, kjo ngjarje nuk i ka shpëtuar syrit të gazetarëve, të cilët kapën edhe momentin e nxehtë midis dy lojtarëve.
"QËNDRONI TË QETË"
Klubi i Bajernit të Mynihut nuk ka folur ende për të këtë çështje, por ndërkohë është mesfushori Leon Gorecka që ka qetësuar të gjithë tifozët e Bajernit. Gjermani publikoi një foto në "Instagram"-in e tij ku shfaqet i përqafuar me Zherom Boatengun. Në fund të fotografisë ishin shkruar edhe fjalët: "Futbolli është emocion, të gjithë të qëndrojnë të qetë". Me të njëjtën mënyrë i është përgjigjur edhe Boateng. "Gjithçka shkon mirë midis nesh, mund të relaksoheni". Sipas "Bild", të dy lojtarët kanë pasur një takim urgjent me trajnerin Flik, i cili u ka kërkuar lojtarëve të tij të kontrollonin nervat. Të dy lojtarët mësohet t'i kenë kërkuar menjëherë falje trajnerit, shokëve të skuadrës dhe njëri-tjetrit. Kështu, disa e sotme parashikohet të jetë sërish e qetë në qendrën stërvitore të klubit të Bajernit që shpeshherë kthehet në një arenë boksi nga lojtarët.