Flamurtari fiton Kupën, thyen Partizanin në Vlorë
Skuadra e Viron Toskës rrëmben trofeun e parë të sezonit
Është Flamurtari skuadra fituese e Kupës së Shqipërisë 2020 në basketboll për femra. Vlonjatet mposhtën dje në finale Partizanin me rezultatin 110-85, duke e koleksionuar trofeun e 19-të në historinë e klubit. Ndërsa nga ana tjetër, ëndrra e Partizanit për suksesin e parë në këtë kompeticion shuhet në finale. Flamurtari me 4 të huaja në përbërje dhe Partizani me një skuadër tërësisht vendëse, dhuruan një basketboll shumë të bukur. Takimi nisi me shumë emocione dhe interes nga të pranishmit vlonjatë, por edhe nga ata të ardhur nga kryeqyteti. Perioda e parë ishte spektakolare, e luftuar, në të cilën skuadrat u ndanë me 1 pikë, ku kryeqytetaset fituan minimalisht 23-24. Ndeshja luhet me ritëm të lartë, karakteristikë për një përballje si kjo mes dy ekipeve më të mira të Shqipërisë. Në periodën e dytë vlonjatet bënë autokritikë, duke e kthyer gjithçka në avantazh të tyre e duke fituar periodën 28-17. Ndërprerja u dha mundësinë trajnerëve të jepnin instruksionet aq të vyera në ato çaste ankthi. Me rifillimin
e periodës së tretë, Flamurtari sërish me eksperiencën që ka parakaloi, duke shënuar plot 32 pikë kundrejt 15 të Partizanit. Kalimi i sekondave në fytyrat e lojtareve ishte një pamje e emocion më vete, që kjo përballje solli. Vajzat e drejtuara nga trajnerja Koçi
reaguan në periodën e fundit duke e fituar 27-29, por kjo ishte e pamjaftueshme për të përmbysur shifrat. Plot 5 lojtare të Flamurtarit regjistruan statistika dyshifrore në shënimin e pikëve, ku spikati amerikania Bei me 25, që ishte edhe shënuesja më e mirë e ndeshjes. Për kryeqytetaset, edhe një herë tjetër lojtarja më e mirë ishte Lalaj, por 24 pikët e shënuara prej saj nuk mjaftuan për t'i dhënë suksesin Partizanit. Në fund u bë edhe ceremonia e dorëzimit të trofeut nga presidenti Ponari, me festën e vlonjateve që shpërthyen në parket. Kështu, pas dy vitesh thatësirë, Kupa rikthehet te Flamurtari, me vlonjatet që mbeten favorite kryesore edhe për fitimin e kampionatit dhe të Superkupës, pasi këtë gjë e dëshmon më së miri ecuria e këtij edicioni, ku njohin vetëm fitore, madje të gjitha me tri shifra.