Shënkolli bën historinë, bindin Partizani dhe Vllaznia
KUPA/ Zbardhen gjysmëfinalet te moshat
Shënkolli është surpriza e madhe e Kupës së Shqipërisë për U-17 dhe U-19. Në ndeshjet e djeshme akademia që përfaqëson qytezën afër Lezhës ka mahnitur me dy fitore ndaj Shkëndijës së Tiranës për paratërinj dhe Teutës për të rinj. Një punë e shkëlqyer nga drejtuesit e kësaj akademie, që po jep fryte tashmë, teksa trajnerët Klajdi Reçi dhe Hasan Hoxha kanë vite që stërvisin grup-moshat U-17 dhe U-19. Në sfidën ndaj Shkëndijës së Tiranës, luajtur në Pezë, vendosi dopieta e Çunit për Shënkollin. Goli i parë u realizua në minutën e 37-të, ndërsa dyfishimi erdhi në pjesën e dytë. Festa e 17vjeçarëve ishte legjitime pas ndeshjes në dhomat e zhveshjes. Pas përfundimit të kësaj ndeshjeje, nisi ajo e U-19, e cila ishte shumë dramatike. Nuk mjaftuan 90 minuta për të konfirmuar fituesin e çiftit Shënkolli-Teuta. Në pjesën e parë skuadrat shënuan nga një gol secila, fillimisht Daija për shënkollasit e më pas Qehaja për durrsakët. Pjesa e dytë ishte shumë e ekuilibruar, por skuadrat nuk e gjetën më rrugën e rrjetës. Më pas gjithçka shkoi te penalltitë, aty ku të rinjtë e Shënkollit ishin më të qartë. Daija, Marku dhe Bisha shënuan nga pika e bardhë, ndërsa vetëm Djala goditi jashtë. Nga ana tjetër, për Teutën realizoi vetëm Muka, ndërsa gabuan Qehaja, Pelivani dhe
Beqja. Përfundimisht, 3-1 për Shënkollin, që arrin një rezultat historik me të dyja grup-moshat në Kupën e Shqipërisë, duke qenë tashmë pjesë e turit gjysmëfinal.
Pas 4 ndeshjeve të së premtes dhe 4 të tjerave që u zhvilluan dje, kanë marrë fund takimet çerekfinale
të Kupës së Shqipërisë për moshat. Paratërinjve të Tiranës dhe Football Republic i janë shtuar edhe Partizani me Shënkollin. Ndërsa te të rinjtë, veç Tiranës dhe Dinamos, kanë kaluar më tej Vllaznia me Shënkollin. Janë pikërisht këto skuadra që do të diskutojnë gjysmëfinalen me njëra-tjetrën dhe do të kenë shansin që të pretendojnë trofeun. Për paratërinjtë e "demave" vulosi goli i Dezhgiut në të 65-tën, ndërsa te të rinjtë Nika dhe Mali barazuan shpejt rrjetat e Qatos dhe Moshos, duke e çuar këtë duel te 11-metërshat. Çiftet gjysmëfinaliste do të përcaktohen sot me short të lirë dhe ndeshjet do të luhen të martën e të mërkurën.