Luhet për rokadë, Mërgjyshi: Dua vetëm fitore
"Rregulluam organikën, kundërshtari mbrohet fort"
Apolonia nuk do blofe ndaj Shënkollit. Fierakët do të zbresin sot në "Loni Papuçi" vetëm për fitore dhe vendin e dytë. Bardhejeshilëve u ka ardhur shansi i artë në duar, pas ndalesës së Lushnjës në Orikum. Fakti që e luajnë shtëpi javën e 14-të, u jep një motiv më shumë për të synuar rokadën e pozicioneve dhe për t'i shtuar më shumë presion Pogradecit kryesues. Me përforcimet e bëra gjatë janarit, stafi teknik ka edhe luksin e zgjedhjeve. Konkurrenca është shtuar ndjeshëm, gjë që kënaq edhe Artan Mërgjyshin.
MERKATO - Në prononcimin e dhënë para ndeshjes, trajneri vlerëson merkaton e bërë. Edhe pse disa nga lojtarët nuk mund të aktivizohen direkt, ai sheh më larg se kaq. "Them që e kemi rregulluar organikën, sepse kishim probleme me lojtarët e dëmtuar. Vetëm Mehmeti është rikuperuar momentalisht. Kemi më shumë mundësi dhe alternativa për formacionin, ndonëse Ejoh apo K.Lushaku nuk janë ende gati për të zbritur në fushë për këtë përballje. Gjithsesi, afrimet më qetësojnë për vazhdimësinë. Gara nuk mbyllet këtu. Do të kemi më shumë mundësi zgjedhjeje. Zaimaj po përshtatet me grupin dhe mund të marrë minuta ndaj Shënkollit", kështu e nisi fjalën e tij numri një i pankinës së Apolonisë.
NDESHJA - Nuk kishte si të mos fliste për 90 minutat që do të luajnë sot, prej të cilave pret maksimumin. Vlerëson kundërshtarin, ndonëse nuk dëshiron që të merret me gabimet e bëra nga rivalët. "Është një kundërshtar që meriton respektin maksimal dhe këtë nuk e them vetëm prej faktit se çdo ndeshje vlen 3 pikë. Duhet theksuar se në 11 ndeshjet e fundit Shënkolli ka humbur vetëm 1 herë, me 2 fitore dhe 8 barazime. Kjo gjë tregon se është një skuadër e vështirë, që mbrohet fort dhe që nuk e ka kompleks fushën, ndaj e kërkon rezultatin kudo që të luajë. E di shumë mirë që do të jetë një sfidë delikate, pasi ua njoh mentalitetin. Ndaj, e kam përgatitur skuadrën që të jetë e kujdesshme, pasi vetëm kështu mund të marrim rezultatin maksimal. Rezultatet e rivalëve këtë javë? Ne shohim vetëm punën tonë, nuk bëjmë llogaritë e të tjerëve", përfundoi 51-vjeçari i stolit të fierakëve.