Rekord 320 milionë euro, Interi mbret i merkatos
Seria A nuk pyet për shpenzime as në janar
Ato që blihen në treg gjykohen kur konsumohen në tavolinë. Janar i paprecedent ky i 2020-ës për nivelin më të lartë të futbollit italian. 20 përbërëset e kampionatit të sivjetmë kanë shpenzuar në total 332,1 milionë euro për t'u përforcuar gjatë hapësirës së dimrit. Kjo shumë e tejkalon rekordin e vitit të kaluar, që ishte 168 milionë euro. Në këtë kuadër, nëse shpenzimeve të dimrit të sivjetshëm u shtojmë ato të verës së kaluar (1,12 miliardë euro), rezulton që Seria A ka shpenzuar gati 1.5 miliardë euro për lojtarët e sezonit aktual. Duke u hedhur një sy "trastave" të shpenzimeve të ekipeve të Serisë A, uria e Interit për titull dallohet qartë. Gjatë fazës së parë zikaltrit u treguan fantastikë, por shfaqën edhe disa boshllëqe.Titullarëve, shpesh të sfilitur, u është dashur të luajnë e më shumë për mungesë alternativash në lartësinë e duhur. Dëmtimet e Sensit e Barelës u dhanë të drejtë ankimeve të Kontes, i cili qahej me të drejtë për pikët e tepërta të lëna në fraksionet e dyta. Me Lukakun e Lautaron, lehtësitë kanë ardhur në ndeshjet në transfertë ku edhe hapësirat kanë qenë më të shumta. Përse kjo vështirësi? Sepse Kontes nuk iu plotësua dëshira për një mesfushor që i njeh golat siç është Vidali, por edhe sepse krahët kanë pasur rendiment më të ulët sesa nevojat.
Me pak fjalë, Interit i ka munguar vlera e shtuar në fazën sulmuese, praktikisht një lojtar që njeh pasimet në korridore dhe kombinimet për t'u futur në zonat rivale. Zgjidhjet për Konten erdhën gjatë janarit, me klubin që i vuri në dispozicion Eriksenin, Jangun dhe Mozesin, të cilëve u shtohen të rikthyerit nga dëmtimet, si Sensi apo Barela. Me apo pa topin në zotërim, trajneri zikaltër kërkon agresivitet që shoqërohet me shpenzim të lartë energjik. Për këtë arsye duhen zëvendësues në lartësinë e duhur. Mozes e Jang do të plotësojnë nevojat në korsitë anësore, me anglezin që ka filluar punë që me asistin për Lautaron në Kupën e Italisë. Ilaçi i vërtetë për mbrojtjet e mbyllura pritet të jetë Kristian Eriksen. Danezi që njihet si specialist goditjesh dënimi, do të ndihmojë Brozoviçin në ndërtimin e manovrës, por sidomos do të jetë ura ideale për të furnizuar pykat. Merkatos së Interit i mungoi një qershi, siç do të ishte një sulmues me peshë i tipit Jorente apo Zhiru, teksa Lukaku duket se do të jetë i dënuar me përjetësi në fushë. Sançez dhe Esposito mund të luajnë rolin e Lautaros, por kush do ta mbushë zonën me centimetra, siç bën prej fillimit të sezonit belgu?
- Nëse "batanija" e Interit ishte e shkurtër, ajo e Juventusit është e gjatë dhe cilësore, por kjo nuk është justifikim për goditjet e munguara në merkaton e janarit. Sarri kishte nevojë për prurje e jo për të forcuar ekipin, por për ta bërë atë më "sarrian". Vështirësia për të ndryshuar taktikisht ishte një nga problematikat bardhezi gjatë gjysmës së parë të sezonit. Përjashto Pjaniçin, mesfushorët e "Zonjës" kanë vështirësi qarkullimi, çka ka penalizuar ritmet dhe lëvizjet si ato që predikon trajneri. Xhan iku, por Kielini dhe Khedira pranë rikthimit do të jenë afrime me peshë në javët në vijim, teksa për vitin tjetër është siguruar Kulusevski. Ndonjë tifoz mund të ankohet, por ankesa duhet të jetë e përmbajtur.
- Lacio e sivjetshme na kujton Napolin e sezoneve të kaluara që, edhe pse i afrohej titullit, gjatë janarit nuk bënte goditjen që mund të sillte diferencën. Igli Tare duhet t'i garantonte Inzagit një pykë dhe një alternativë për mbrojtjen. Vjet bardhekaltrit zhvilluan një fazë të dytë mediokre, ndaj për të kërkuar të paktën Champions-in, a nuk nevojitej pak më tepër guxim?
- Mes "grindaveceve" për vendin e katërt ka bërë më mirë Atalanta duke risjellë në bazë Kaldarën, duke afruar Zhiborran, por sidomos duke gjetur te Tameze një alternativë për të ndihmuar De Ronin të pushojë më shpesh. Roma nuk arnoi vrimën e shkaktuar nga largimi i Florencit, nuk i gjeti një alternativë Xhekos, por sidomos nuk zëvendësoi Zaniolon. Perez nga Barcelona është një emër intrigues, por Fonseksës i duhej diçka tjetër, në një rol tjetër. Mes eurokandidateve është Milani që me Ibrën ka gjetur një shpirt për skuadrën, teksa me Kjaer e Begoviç "vjetërsinë në punë". Selemekers nuk mund të bëjë diferencën, teksa largimet e Susos e Piontekut do të pakësojnë problemet për Piolin. Punë e paqme edhe për Napolin që me Demen, Loboktan, Politanon i ka dhënë material Gazutos për 4-3-3-shin e tij, teksa De Laurentis ka bërë goditje edhe me pamje nga sezoni i ardhshëm, si Amir Rrahmani.
- Meriton notën dhjetë Fiorentina. Pavarësisht nga problemet e shumta, vjollcët kanë gjetur një ecuri tjetër në vitin 2020. Merita ka dhe pritet të ketë merkatoja me presidentin Komiso që ka grisur çeqet e para duke sjellë në Firence vezë për sot (Dankan, Kutrone e Igor) dhe pulë për mot (Ambrabat, Kuame,Agudelo).