“Titulli? Kujdes, është edhe Dortmundi”

Për Hansi Flikun dueli për titull do të jetë pa dyshim ndaj Borusias së Dortmundit, edhe pse Lajpcigu dhe Gladbahu janë aty. "Nuk e pashë ndeshjen e tyre, po rezultati flet vetë. Verdhezinjtë do të jenë një kërcënim deri në fund", tha Flik. Më pas tekniku i bavarezëve foli edhe për ndeshjet ndaj Maincit ku vlerësoi shumë paraqitjen e skuadrës së tij. "Komplimentet shkojnë për djemtë që në fushën e lojës dhanë gjithçka nga minuta e parë deri në fund. Jam i lumtur për rezultatin dhe lojën. Kur të dyja këto janë pozitive, do të thotë që puna që ke bërë gjatë javës ka dhënë frytet e saj". Ndërkohë, numri 1 i pankinës së kampionëve të Gjermanisë nuk harroi t'i thurte elozhe edhe mesfushorit spanjoll, Tiago Alkantara: "Ai është një lojtar shumë i rëndësishëm për skuadrën tonë. Sot (dje) pashë një magji si në kohët e vjetra. Shpresoj që të vazhdojë kështu, pasi tani nis pjesa e vështirë e kampionatit". Në fund, Flik paralajmëroi skuadrën se nuk duhet të mendojë për majin. "Djemtë janë profesionistë dhe e dinë që muajt e ardhshëm do të jenë deçizivë në arritjen e objektivave. Kemi kaluar vetëm gjysmën e sezonit dhe kemi edhe një pjesë të dytë, kjo është më e vështira, duke nisur nga ndeshja e radhës që kemi në shtëpi ndaj Lajpcigut". Kujtojmë që Flik e mori skuadrën pas shkarkimit të trajnerit, Niko Kovaç, para tre muajsh. Tani Bajerni është ndryshe dhe falë punës së mirë të Flikut, është rikthyer si pretendente kryesore për të fituar sërish kampionatin gjerman. Ai ka një marrëdhënie të mirë me të gjithë lojtarët dhe drejtuesit e skuadrës, të cilët i kanë besuar drejtimin e ekipit deri në fund të sezonit.