Liverpuli është një rul, shtyp edhe Sauthemptonin
22 pikë para Sitit, shifrat e frikshme të ekipit të Klopit
Shtatëdhjetë e tri pikë dhe shkurti sapo ka nisur. Mjafton kjo, pa shtuar gjë tjetër për të shpjeguar absurditetin e sezonit të Liverpulit në Premier Ligë. Fitoret sezonale tani janë 24 nga 25 ndeshje, vetëm 1 gol i pësuar në 10 javët e fundit të kampionatit dhe ndeshjet radhazi pa humbje shkojnë në 42. Njëzet e dy pikë përpara Mançester Sitit të vendit të dytë (kampionët e Pep Guardiolës zbresin sot në fushë kundër Totenhemit). Asgjë nuk po i ndal kampionët e Europës në kampionat, as një Sauthempton në formë të shkëlqyer, i cili në pjesën e parë arrin të kthehet në dhomat e zhveshjes i pamposhtur, diçka e pazakontë përballë "Reds"-ave këtë sezon. Por, 45 minutat e dyta nisin me një zemëratë të papërballueshme të miqve ndaj "Shenjtorëve", të cilët e mbyllin ndeshjen me një "poker" në portën e MekKartit: Çembërlein zhbllokon me një të djathtë nga jashtë zone në minutën e 47-të: Firmino, në rolin e asistmenit në këtë ndeshje, fton kapitenin Henderson në zonë të shënojë golin e 2-0 dhe pastaj jep një asist gjenial për
golin e 3-0 të Salah. Sulmuesi egjiptian mbyll llogaritë pas një tjetër kundërsulmi në 90' dhe ai që e shërben është përsëri ylli brazilian: Firmino ngjitet në kuotën e 50 asisteve për Liverpulin në të gjitha kompeticionet (228 ndeshje), 11
më shumë se çdo futbollist tjetër në klub që kur ai është transferuar në "Anfield" në vitin 2015. Tani titulli i ëndërruar prej 30 vitesh i kampiones së Anglisë është një formalitet për "Reds"-at. Diferenca e 22 pikëve nga vendi i dytë është
avantazhi më i thellë që një kryesuese ka pasur ndonjëherë në historinë e kampionatit anglez.
Statistikat - Për Liverpulin në Premier Ligë ishte fitorja e 20-të radhazi në "Anfield". Ata barazuan rekordin e Mançester
Sitit (mars 2011-mars 2012). Vetëm një skuadër ka një seri më të gjatë fitoresh në shtëpi: është gjithnjë Liverpuli (janar-dhjetor 1972) i famshëm i Bill Shenklit. "Reds"-at kanë grumbulluar 100 pikë nga 102 të fundit të mundshme në Premier
Ligë, duke fituar 33 nga 34 ndeshjet e fundit dhe kanë dështuar të marrin maksimumin vetëm në transfertën kundër Mançester Junajtidit në tetor 2019. Momo Salah, autori i një dopiete ndaj "Shenjtorëve", ka shënuar në Premier Ligë më shumë gola në shtëpi këtë sezon se çdo futbollist tjetër (12). Që kur egjiptiani është transferuar në "Anfield" në vitin 2017, vetëm Lionel Mesi (51 gola) ka realizuar më shumë gola brenda fushe në pesë kampionatet kryesore të Europës sesa Salah (44).