Kontrata, Kukësi do rinovimin me Shkurtajn
27-vjeçarit i mbaron kontrata në verë, klubi shpreson të gjendet akordi si me Limajn
Kukësi renditet në vendin e parë në kampionat, kjo për meritë të të gjithë ekipit, por veçanërisht të liderit të sulmit, Vasil Shkurtaj.
Sulmuesi 27-vjeçar ka treguar një formë mjaft të mirë sportive, ku me golat dhe lojën e tij është kthyer në një prej pikave të referimit të Kukësit. Ai ka shënuar 13 gola në 17 ndeshje të luajtura e këto shifra kanë bërë që lojtari jo vetëm të justifikojë shifrën e paguar te Luftëtari (70 mijë euro) nga ana e presidentit Gjici, por edhe t'i tejkalojë pritshmëritë. Deri në fund të sezonit sulmuesi ka si qëllim të kalojë shifrën e 20 golave dhe të shpallet kampion me Kukësin e më pas të kalojë në një kampionat më të fortë europian. Forma e tij e mirë dhe aftësitë sulmuese zgjuan interesin e disa klubeve jashtë vendit. Gjatë merkatos së janarit burime pranë klubit u shprehën se për lojtarin kishte ofertë nga
Holanda, por as shifra dhe as emri i klubit nuk u zyrtarizua. Presidenti Gjici nuk kënaqej me pak, shifra që ai kërkonte ishte jo e vogël, gjë që nuk u realizua. Gjithsesi, një gjë është e sigurt, që Kukësi nuk do ta humbasë Shkurtajn me parametra zero në verë. Sulmuesit shtatlartë i përfundon kontrata në fund të sezonit e lojtari me shumë gjasa do të vazhdojë karrierën e tij jashtë vendit, por ekuacioni është nëse Kukësi do ta pranojë këtë vendim ose jo. Duke parë të gjitha këto elemente, drejtues të Kukësit, por edhe shokë të skuadrës i kanë shprehur lojtarit dëshirën që ai të rinovojë e të qëndrojë. Biseda zyrtare nuk ka pasur, vetëm informale. Qëllimi është i qartë, Kukësi dëshiron të mbajë "xhevahirin" e tij edhe për
sezonin e ardhshëm. Shkurtaj është pjesë e Kukësit që prej janarit të vitit 2019, kur firmosi për 1 vit e gjysmë. Ai ka një eksperiencë me disa klube të huaja, si: Panionios, Volos, Asteras Tripolis, Ksanthi, Aris, Roda në Holandë dhe Tondela në
Portugali.
Kukësi pati një shembull shumë të freskët sa u përket rinovimeve. Vesil Limajt i skadoi kontrata në janar, por te Kukësi ishin të sigurt për vazhdimësinë me lojtarin, pasi kishin kryer biseda me të edhe më herët. Palët ranë dakord për aspektin financiar dhe lojtari firmosi edhe për 1.5 vite me nënkampionët. Ashtu si dhe Shkurtaj, Limaj ishte dhe është subjekt marketingu dhe shitjeje. Gjithsesi, një gjë tjetër është e vërtetë, presidenti Gjici është i fiksuar pas titullit kampion dhe nëse për cilindo lojtar të Kukësit nuk vjen një ofertë e bindshme, si ajo e Sindrit Gurit, është e vështirë që ai t'i lëshojë për shuma të vogla. Të mos harrojmë që Gjici ka paguar te Luftëtari 50 mijë euro për kartonin e Eduart Rrocës, 70 mijë euro për Vasil Shkurtajn, si dhe 50 mijë euro te Teuta për kartonin e Arbër Çyrbes, i cili nuk arriti pritshmëritë e presidentit dhe u kthye sërish në Durrës.