Arbitrat nën hyqmin e FSHF-së, Pregja dhe Janku për “Guiness”
Analiza/ Tahir Kastrati ka dështuar, Sokol Jareci të marrë përgjegjësi
Kur flasim sot për gabimet e vazhdueshme të arbitrave, nuk mund të kufizohemi vetëm me analizën ndaj atyre njerëzve me bilbil që zbresin në fushën e lojës dhe vendosin drejtësi. Kur gabimet janë të rënda dhe të shpeshta, atëherë vlen të diskutohet edhe performanca e sektorit të arbitrimit. Javën që shkoi, ra në sy fakti që nuk kishte në aktivitet asnjë gjyqtar kryesor apo anësor me stemën e FIFA-s. Ra në sy se "të rinjtë" që po u jepet shansi dhe po e shpërdorojnë, ndoshta nuk janë ende gati për të marrë përgjegjësi. Por pas kësaj lind pyetja: Si jemi sot me kolegjiumet? Sa arbitra nga Vlora kemi? Sa nga Shkodra? Sa nga Korça? Po nga Gjirokastra? Po nga Fieri dhe Lushnja...?
Këto janë pyetje që do të duhej ta vendosnin në siklet sektorin e arbitrimit. - Disenjatori Sokol Jareci, përveçse një menaxher i mirë, një i ri me perspektivë në instancat drejtuese, ka përgjegjësinë për përcaktimin e rëndësisë së një
ndeshjeje. Ka përgjegjësi kur asnjë arbitër me stemën e FIFA-s nuk arbitron. Ka përgjegjësi edhe për besimin, ndoshta të tepruar që u jep disa të rinjve që nuk janë ende të gatshëm që të
arbitrojnë ndeshje elitare. Natyrisht, ka edhe për detyrë që kërkojë që të zgjerohet rrethi i arbitrimit. Ai vuri fytyrën e tij në propagandën që iu bë akademisë së arbitrimit dhe tani duhet t'i dalë për
zot atij projekti.
- Tahir Kastrati, një profesor i nderuar, që prej më shumë se një dekade drejton Shoqatën e Arbitrave, por ajo sot është në ditët e veta më të errëta. Tërësisht e varur nga
kupola e FSHF-së, me po të njëjtët njerëz që qarkullojnë aty dhe me kolegjiume të rretheve në pikë të hallit. Sot gjendja e sektorit të arbitrimit është pasqyra ku Kastrati sheh çdo javë rendimentin e punës së tij...
- Bujar Pregja, kryetar i Kolegjiumit të Tiranës, anëtar i Komisionit të Vlerësimit dhe delegat i FSHF-së, pothuajse në çdo javë të kampionatit. Një ish-gjyqtar i shquar, që sot e ka shtrirë influencën në disa sektorë. Pra, sot Pregja edhe përpilon listat se kush do të promovohet nga kolegjiumi që drejton, edhe i vëzhgon ata gjatë një ndeshjeje, edhe i vlerëson ata për punën që bëjnë pas një ndeshjeje. Skandaloze... E gjithë kjo bëhet me "bekimin" e shefave të FSHF-së.
- Albano Janku, ishgjyqtar i shquar, që sot punon në Komisionin e Vlerësimit të Arbitrave, është vëzhgues sistematikisht nëpër ndeshje dhe më pas del të bëjë moviolën në TV. Pra, Janku i vëzhgon arbitrat për llogari të FSHF-së, i vlerëson ata publikisht dhe më pas u bën "procesin" edhe te Komisioni teknikogjykues. E paparë! Ky është një tjetër rast për t'u studiuar dhe tregon më së miri se në ç'derexhe është sot arbitrimi shqiptar.