Elezi: Arbitri na mohoi 2 penallti në Laç, Bylisi nuk ka asnjë shans
Humbja në Laç ishte e para për Skënderbeun në këtë vit dhe duket se në kampin bardhekuq lojtarët janë të vendosur, duke mos e bërë dramë. Në kushtet kur mungoi vijimësia, lojtarët e Skënderbeut janë gati ta rikthejnë ekipin drejt fitoreve duke nisur nga kjo e kësaj jave kundër Bylisit. Mesfushori më i ri i korçarëve, Agon Elezi, është duke kaluar një moment të mirë duke fituar edhe fanellën e titullarit. Në një prononcim të dhënë për "Panorama Sport", Elezi tregon humbjen e pamerituar në Laç përballë një kundërshtari të fortë, ndërsa peshën kryesore të fajit ia lë gjykimit. "Mund të them se ndeshja e së hënës në Laç për nga mënyra se si shkoi loja duhet të përfundonte barazim. Nuk është se kundërshtari bëri diçka më shumë në fushë se ne. Ne zhvilluam një ndeshje të mirë, pavarësisht mungesave në këtë takim. Zhvilluam një takim me ritëm të lartë dhe mendoj se meritonim më shumë. Të mos harrojmë se na janë mohuar dy 11-metërsha në momentet kur ndeshja ishte 0-0. Episode të cilat do ta kishin ndryshuar komplet takimin. Ndaj, mendoj se ishte arbitri ai që na penalizmi", tha Elezi.
BYLISI - 18-vjeçari Elezi është i bindur se Skënderbeu do të rikthehet te rezultatet pozitive në ndeshjen pasardhëse. Optimizmi i Elezit është i madh se ndaj Bylysit nuk do të ketë më surpriza. "Humbjen me Laçin duhet ta lëmë pas dhe të përqendrohemi te ndeshja e radhës në kampionat, që do ta luajmë përballë Bylisit në shtëpi. Përqendrimi dhe motivimi ynë është maksimal për të fituar këtë takim dhe për të mos pasur më surpriza. Bylisi na ka mundur në ndeshjet e fazës së parë në Korçë, por tani është një histori ndryshe. Ne jemi shumë herë më të fortë dhe më të kompletuar se në fillim të sezonit, për këtë arsye kundërshtari nuk na tremb dhe nuk ka asnjë shans përballë nesh", vijoi mesfushori nga Shkupi.
E ARDHMJA - Agon Elezi ecën me ide të qarta se do të bëhet një futbollist i madh, madje kur e pyet për karrierën tregon se Skënderbeun e ka zgjedhur edhe për faktin se kartoni i tij në merkato del shumë herë më thjesht se me çdo ekip tjetër. "Te Skënderbeu ndihem mirë dhe i jam mirënjohës trajnerit që më ka ndihmuar vazhdimisht për t'u rritur. Më ka dhënë shumë besim dhe besoj se më takon mua që t'ia shpërblej. Jam shumë i lumtur që jam pjesë e Skënderbeut dhe jam i bindur se ky klub mund të më katapultojë në një ekip europian. Kjo ka qenë edhe një ndër arsyet se pse unë zgjodha Skënderbeun. Ndryshe nga ekipet e tjera në vend, emri i Skënderbeut ka më shumë peshë në Europë edhe nëse i referohemi transferimit", përfundoi Agon Elezi.