Dadaj mbron portierin: Shokët ta mbështesnin
Luftëtari nuk dorëzohet, drejtori sportiv e quan të pabesë largimin e Zaimit
Drejtori sportiv i Luftëtarit, Artur Dadaj, në prononcimin e dhënë për "Panorama Sport", shprehu rezervat e tij për mënyrën se si skuadra u gjend shumë shpejt në disavantazh ndaj Partizanit. "Një portier i ri (Arlis Shala) që aktivizohet për herë të parë në Superiore, kërkonte edhe mbështetjen e shokëve, ndaj nuk është ai fajtori i vetëm në humbjen 0-3. Përkundrazi, mbrojtja pati përgjegjësi duke mos i qëndruar afër. Në tërësi të gjithë lojtarët kanë pjesën e tyre në humbje. Nuk e tërhoqëm nga fusha portierin se nuk donim ta digjnim. Për të ishte ndeshje vendimtare me Partizanin dhe vendosëm ta aktivizonim edhe në pjesën e dytë. Shkurt, kishte nevojë për mbështetje", u shpreh Dadaj.
DY HUMBJET E FUNDIT - I pyetur se çfarë nuk ka shkuar pas barazimit me Kukësin, Dadaj tha: "Faktorët janë objektivë dhe subjektivë. Kemi luajtur mirë dhe na kanë penguar arbitrat. Na mungon fitorja për të dalë nga ngërçi psikologjik. Nuk ishte fitorja në derbi e Tiranës ndaj Partizanit ajo që ndryshoi klimën te bardheblutë? Edhe Partizani para ndeshjes me ne vinte nga ditë të errëta, por fitoi duke shfrytëzuar mungesën dhe mospërqendrimin e lojtarëve të rinj. Kemi nevojë për një fitore, pasi do ta rikthente më shumë besimin dhe atmosferën në skuadër.
Me Teutën do të jetë ndeshje e vështirë, por do të besojmë deri në fund dhe nuk kemi pse të dorëzohemi. Skuadra do të jetë më e kompletuar në organikë, e vendosur për të marrë më të mirën".
MERKATO - Në fund, Dadaj i pyetur nëse i ka mbetur peng diçka rreth merkatos, u shpreh: "Së pari, mes shumë vështirësive ia dolëm të federonim lojtarët që afruam, edhe pse të rinj në moshë. Mosfederimi i Zaimit më ka mbetur peng. Ai u stërvit shumë kohë me ne dhe iku pabesisht. Kemi afruar lojtarë të rinj me perspektivë. Besoj se shumë shpejt skuadra, falë punës së stafit teknik, do të harmonizohet dhe do të japë maksimumin, që nga ndeshja e radhës në Durrës. Ne besojmë te ky grup i ri lojtarësh". Për Teutën do të mungojë Dushkaj, i pezulluar nga kartonët, por pritet të jenë gati Franc Lala dhe Klinti Qato.