Kardozo: Erdha për të ngjitur Besën në elitë

“Shënoj të paktën 8 gola, Kavaja si lagje e Tiranës”

Prej tri ditësh në Kava jë ka zbarkuar Lukas Kardozo. Braziliani i huazuar nga Partizani ka ardhur me ide të qarta te Besa. Pret që ta ngjisë në elitë, ndërsa paralajmëron se minimalisht do të shënojë 8 gola. Gjatë një interviste të dhënë ekskluzivisht për “Panorama Sport”, ai rrëfen se kush ia dha “urdhrin” që të kalonte te verdhezinjtë. Për të klubi nuk është aspak i panjohur, pasi ka qenë Alban Hoxha dhe Idriz Batha që i kanë folur më herët. Ka gjetur ambientin e duhur, aq sa Kavajën e quan si një lagje të Tiranës.

Kardozo është zyrtarisht i Besës, por kush jua dha “urdhrin” për këtë huazim?

Drejtuesit e Partizanit më thanë se duhet të vija të ndihmoja Besën për rikthimin në Kategorinë Superiore. Dhe si lojtar profesionist, kuptohet që s’më mbeti gjë tjetër veçse ta pranoja këtë vendim që kishte marrë klubi.

Kishit dëgjuar më parë për kavajasit?

Jo vetëm kisha dëgjuar, por e njoh mirë Besën. Alban Hoxha më ka treguar se vite më parë ka qenë pjesë e këtij klubi, por edhe Batha apo ndonjë tjetër. Jo për diplomaci, por futbolli kavajas e ka vendin në elitë. Them kështu nisur nga tradita dhe fundja dhe afërsia gjeografike. Aq afër është, sa më duket sikur Kavaja është në një lagje të Tiranës.

Si ju pritën, cili është impresioni juaj i parë?

Që ditën e parë m’u duk ambienti i ngrohtë dhe me djem që ishin mjaft të sjellshëm. Pa folur për stafin. Mesazhi i parë që mora ishte besimi në fytyrat e tyre, që ishin gjithnjë të qeshura. Gjeta një gërshetim ideal të lojtarëve me përvojë dhe disa djemve të rinj. E dija më herët dhe më gëzoi fakti se luhej futboll teknik e me ide, në të cilin unë e gjej veten. Kushtet e stërvitjes, mjaft të mira.

E dini që te Besa presin shumë nga ju?

Është normale kjo, derisa erdha në një klub që luan në Ligën e Parë. Përtej historisë së Besës, e di që nga unë presin që të bëj diferencën. Ndihem mirë fizikisht dhe psikologjikisht. Jam i gatshëm për ndeshje, por këtë e vendos trajneri. Dëshira ime është të jap maksimumin dhe sadopak ta ndihmoj ekipin të rikthehet aty ku duhet të jetë, në Superiore. Veçse dihet se futbolli është lojë kolektive e secili duhet të justifikojë besimin e presidentit, trajnerit, shokëve e tifozëve. Luka dhe askush tjetër, s’mund të bëjë asgjë i vetëm.

Çfarë i premton Kardozo klubit dhe tifozëve ?

Pikësëpari do të stërvitem si profesionist, duke dhënë shembull. Së dyti do të jap përherë maksimumin, sa herë që do të jem në fushë. Dhe e fundit, kam dhe një objektiv personal. Dëshiroj që më së paku të shënoj 8 gola për Besën, nëse shënoj më shumë, aq më mirë. Shpresoj dhe uroj që ardhja ime në Kavajë të jetë një ogur i mirë për mua dhe ekipin.