Rregulla e çuditshme, Barça mund të kërkojë një sulmues

Varen nga Dembele, por ja cilat janë alternativat

Barcelona është gati që të futet në merkato për të afruar një sulmues pavarësisht se janari ka përfunduar dhe afatet për federimin e lojtarëve gjithashtu. Por çfarë ndodh? Ekziston një rregullore në federatën spanjolle që të lejon të zëvendësosh futbollistët e dëmtuar që do të mungojnë të paktën 5 muaj. Brenda 5 ditësh, skuadra e Barcelonës ka të drejtë të plotësojë të gjithë dokumentacionin për Dembelenë. Rregullorja e thotë qartë se katalanasit mund të futen në merkato, por janë të varur nga koha që do të mungojë francezi Dembele. Çdo lojtar duhet të jetë i dëmtuar për një kohë 5 muaj ose më shumë. Por rregullorja e përcakton qartë se këta lojtarë që mund të transferohen duhet të aktivizohen në Spanjë dhe në të gjitha kategoritë.

VENDIMI - Gazeta "Marca" shkruan se drejtuesit kanë diskutuar me njëri-tjetrin dhe kanë marrë vendimin që të riparojnë repartin e sulmit dhe të futen në merkato për të afruar një lojtar. Sezoni është i gjatë dhe shumë i vështirë për t'u përballuar vetëm me këta lojtarë që janë në dispozicion. Kanë dalë emrat e parë që mund të veshin fanellën katalanase gjatë kësaj kohe. I pari është Stuani, i cili u përfol edhe për merkaton e janarit. Girona sigurisht që nuk ka ndërmend të lërë të largohet, por nëse Barcelona paguan 20 milionë euro klauzolën e tij, atëherë uruguaiani bëhet automatikisht lojtari më i ri i katalanasve. Por në listë janë gjithashtu edhe Uillian Hoze apo Loren i Betisit. Gameiro është gjithashtu një alternativë interesante për Kike Setienin, por po vëzhgohen edhe Angel, Molina, Mata dhe Dejverson.