"Ronaldo i lumtur, rekordet e tij turpërojnë Perezin"
Ramon Kalderon Ramos, ishpresidenti i Realit, ndalet të komentojë situatën e Kristiano Ronaldos në Torino dhe zbulon për mikrofonat e "TuttoJuve" se çfarë i ka dhënë kampioni portugez për aventurën e tij me ngjyrat bardhezi.
Me dy golat ndaj Fiorentinës, CR7 ka shënuar 9 herë radhazi, duke barazuar rekordin e Trezegesë. Si e komentoni këtë lajm?
Nuk çuditem dhe përveç kësaj jam i bindur se sukseset e tij me Juven nuk do të ndalen me këtë rekord. Kristiano është në gjendje të arrijë gjithçka që është e pamundur për lojtarët e tjerë.
Numrat e tij nuk përfundojnë këtu: 14 gola në 9 ndeshjet e fundit, 50 gola në 70 ndeshje me fanellën bardhezi. Është i huaji i dytë që e arrin këtë kuotë kaq shpejt në Serinë A.
Nuk ka asnjë dyshim që do vazhdojë kështu derisa ta mbajë veshur këtë fanellë. Këto shifra tregojnë gabimin e madh dhe sikletin e madh të presidentit të Realit (Florentino Perez) i cili nuk e shiti për arsye sportive, por për një raport personal të keq. Kur shënoi kaq shumë në Madrid, ishte vendimtar në suksesin e Champions-it të katërt.
Nesër (sot) ai feston 35vjetorin. Deri ku mund të mbërrijë sipas jush?
Kur një sportist zotëron dhuntitë e tij, kujdeset për veten, stërvitet me të njëjtin entuziazëm kur ishte i ri dhe jeton për të qenë një futbollist më i mirë çdo ditë, besoj se është e pamundur për të parashikuar se deri kur mund të shkojë.
Përveç formës së çmendur që po jeton, e shikoni me të vërtetë të lumtur në Torino siç ishte në Madrid?
Mendonte se ishte shumë i lumtur te Reali, pavarësisht marrëdhënies së keqe me presidentin, i cili nuk e kishte vlerësuar kurrë siç e meritonte. Pastaj nuk e kishte transferuar as ai. Kur e takova në një prej inaugurimeve të bizneseve të tij në Madrid, më tha se Torino është një qytet shumë i bukur, mikpritës dhe është i kënaqur që po jeton në Itali. Është integruar mirë brenda Juves dhe më foli me respekt për ngrohtësinë e tifozëve për të.
Nëse një ditë do jeni sërish presidenti i Realit, sa para do të shpenzonit për ta rikthyer në Madrid?
E pata të vështirë të bindja Mançesterin ta shiste dhe fatkeqësisht nuk ka asnjë shifër që do ta sillte në skuadrën e Zidanit. Lojtarë si ai janë të paçmueshëm. Ishte një gabim historik që e lamë të largohej dhe po e paguajmë shumë shtrenjtë.