Kaosi në KOKSH, del në skenë edhe Duka
Presidenti i FSHF-së do të takohet sot me krerët e federatave
Më datë 9 shkurt, siç dihet, do të mbahet asambleja e jashtëzakonshme e Komitetit Olimpik Kombëtar Shqiptar për zgjidhjen e situatës kaotike që prej kohësh është ulur këmbëkryq në institucionin më të lartë të sportit shqiptar. Presidenti Viron Bezhani për muaj me radhë ka lëshuar në mënyrë të vazhdueshme akuza të rënda, duke denoncuar për abuzime sekretarin Stavri Bello dhe "çështja" prej kohësh ka përfunduar deri në prokurori. Një situatë alarmante që e ka paralizuar edhe më keq sportin në Shqipëri. Në asamblenë së jashtëzakonshme, gjithashtu pritet të vendoset data e asamblesë statutore, ku në fakt kjo e fundit duhej të ishte zhvilluar prej kohësh, por vazhdon të zvarritet nga gjendja aspak normale që po kalon KOKSH. Ligji i sportit, por edhe kërkesat e kohës kërkonin rishikimin e këtij statuti, gjithashtu edhe rekomandimet e CIO-s. Propozimet nuk mungojnë ku propozimi i parë është përgatitu nga zv.presidenti i KOKSH si dhe është miratuar nga Komiteti Ekzekutiv. Por jo të gjithë janë dakord me këtë propozim, madje ka nga ata që e konsiderojnë të padrejtë. "Propozimi i zv.presidentit bën që gara e votimit të fillojë afërsisht 40-0", shprehet Labo Çapo, anëtar i Komitetit Ekzekutiv si dhe sekretar i përgjithshëm në Federatën Shqiptare të Xhudos. "Federatat përfitojnë projekte të cilat konvertohen në vota", shton më tej Çapo, duke paraqitur së bashku me disa federata olimpike një tjetër propozim. Ndërsa nisur nga kjo situatë kaotike, mësohet se së fundmi ka dalë në skenë edhe Armand Duka. Me iniciativë të presidentit të Federatës Shqiptare të Futbollit, i cili është zhgënjyer nga mënyra dhe funksionimi i KOKSHit, do të mbahet sot në ambientet e hotelit "Tirana International" një takim ndërmjet federatave që janë kundër asamblesë. Sipas kreut të FSHF-së, KOKSH është kthyer në një institucion që nuk funksionon dhe mendohet se do të kërkohet largimi i aktorëve kryesorë të kësaj situate, si i presidentit Viron Bezhani ashtu edhe i sekretarit të përgjithshëm Stavri Bello.