Çelaj e Mehmetllari janë gati, qetësohet Çoçlli

Luftëtari pret kthesën ndaj Teutës. Fakti që luajnë në shtëpi dhe kanë organikë më të plotë, u jep shpresa gjirokastritëve. Fitorja mungon prej 4 javësh, ndaj emergjenca për pikë ka arritur majat. Vendi i parafundit në tabelën e klasifikimit shton ndjeshëm rrezikun e rënies një kategori më poshtë, ndaj zgjidhje tjetër nuk kanë. Nikolin Çoçlli do të ketë më shumë alternativa kundër durrsakëve dhe kjo konsiderohet ngushëllues. Afrimet e merkatos së janarit mund të marrin minuta që këtë javë. Elian Çelaj dhe Arbër Mehmetllari e ndoqën nga tribuna ndeshjen me Partizanin. I pari pasi nuk ishte stërvitur ende me ekipin dhe i dyti prej dokumentacionit. Ndaj Teutës ata do të jenë një armë më shumë për ofensivën. Çelaj është ingranuar me ekipin tashmë dhe i ka dhënë sinjale të mira trajnerit, ndërsa Mehmetllari mori "viston" që i mungonte nga Lokomotiva e Zagrebit. Është vetë trajneri Nikolin Çoçlli që konfirmon gatishmërinë e tyre për javën e 22-të me Teutës. Në 100% e tij është edhe Franci

Lala, që u ka munguar fushave të blerta prej dhjetorit. Lojtari e ka lënë pas krahëve dëmtimin që pësoi në fitoren 2-0 ndaj Skënderbeut, gjë që e pohon edhe për "Panorama Sport". "E kam kaluar plotësisht dëmtimin e pësuar në ndeshjen me Skënderbeun. Ndihem mirë fizikisht dhe nuk ndiej më asnjë shqetësim. Nuk mund të them nëse do të jem në fushë ose jo, pasi është trajneri ai që vendos", u shpreh mbrojtëse 20-vjeçar. Mungesë e konfirmuar për Luftëtarin është Jurgen Dushkaj, i skualifikur prej kartonëve të verdhë. Në dy përballjet e luajtura me Teutën, Luftëtari është mundur 3-1 në Durrës, ndërsa në Gjirokastër kanë ngecur te barazimi 0-0.