Super-Tirana, përmbysje me “shuplakë” Partizanit
Të kuqtë e nisin me gol, më pas shthuren dhe pësojnë pesë
Super-Tirana shkatër ron Partizanin me "shuplakë" ose ndryshe "manita". Një derbi rekordesh në "Air Albania", duke filluar me stadiumin "full", dy penalltitë për katër minuta dhe përmbysjen e çmendur 51. Të kuqtë e nisën me marsh të pestë, duke shënuar që në minutën e 2-të, por befas iu përmbys "bota" kur bardheblutë me dy penallti të Idriz Bathës kthyen gjithçka në favor. U luajtën 95 minuta të jashtëzakonshme që nisën me supergolin e Melos dhe u mbyllën me perlën e talentit Muçi. Dy kartonë të kuq në ekstremet e lojës dhe me skuadrat që e mbyllën me nga 10 lojtarë. Në fund festa ishte e gjitha bardheblu dhe, me sa duket, 100-vjetori i themelimit të klubit mund të përkojë edhe me titullin që mungon prej një dekade. Pesë gola të shënuar ndoshta as në ëndrrën më të bukur nuk ishte parë te Tirana para ndeshjes, por skuadra e Emanuel Egbosë tregoi një cinizëm për t'u admiruar ndaj rivalëve të përjetshëm. Tashmë historia e derbeve ndryshon dhe ndoshta më e hidhur bëhet humbja e dytë këtë sezon për "demat" edhe për faktin se u përmbysën nga ish-lojtari i tyre, Batha.
PJESA E PARË
Presion asfiksues nga të kuqtë që në start dhe menjëherë gol. Në zhvillimet e një goditjeje nga këndi, Tirana kapet në befasi dhe Melo shkarkon një të djathtë fantastike, duke e dërguar topin në trekëndësh. Nisje më të mirë se kaq në derbi nuk mund të presësh, por futbolli prandaj është i bukur, pasi situatat mund të ndryshojnë. Ngo dhe Kobinah nuk shfrytëzojnë dot një dalje të gabuar të Alban Hoxhës, ndërsa më pas "demat" humbasin shansin për ta çuar ndeshjen në 0-2. Brajan Braun godet dy herë brenda zonës, por Lika reagon mrekullisht. Dhe po nuk shënove, do ta pësosh. Një mosmarrëveshje e Belicës me Bitrin kthehet në asist për Torasën, që u vjedh kohën mbrojtësve dhe rrëzohet në zonë pas shtyrjes nga beratasi. Një ndëshkim i dyfishtë për Partizanin, pasi Bitri merr karton të kuq dhe nga ana tjetër Batha barazon shifrat nga penalltia. Vendoset baraspesha dhe Tirana merr zemër. Të kuqtë gabojnë shumë në qendër të mbrojtjes, ndërsa bardhe
blutë shfrytëzojnë dyshen Torasa-Kale me topa vertikalë. Është ky i fundit që përfiton nga një vendosje e gabuar e prapavijës së kuqe dhe fiton një penallti. Duket gati e pabesueshme si rrjedhin ngjarjet, por Tirana e sheh veten në avantazh pas
golit të dytë të Bathës, që është perfekt përballë Hoxhës me goditjet nga 11 metra. Tirana është në delir, ndërsa "demat" e kanë të vështirë ta marrin veten me 10 lojtarë, aq më tepër që Sormani ka larguar nga fusha sulmuesin Braun për të aktivizuar
mbrojtësin Bilali pas daljes me të kuq të Bitrit. Tentativat e Melos dhe Çinarit me goditjet nga jashtë zone nuk mjaftojnë. Të kuqtë bëhen të rrezikshëm veçanërisht nga goditjet standarde. Një gafë e Likës në largimin e topit nga zona për pak sa e çon
ndeshjen në 2-2, ndërsa më pas Hoxhallari tremb Hoxhën me një goditje nga distanca. Hakaj i vendosur në krahun e majtë pas mungesës së Trashit, sikur eklipson Kobinah me markimin që i bën, por ganezi sa herë ka topin në këmbë, futet në driblim dhe sjell panik. Pjesa e parë mbyllet me një moment të mirë të krijuar nga Kale, por që Alban Hoxha pret goditjen e brazilianit dhe gjithçka mbyllet 2-1.
PJESA E DYTË
Pas pushimit loja duket një fotokopje e pjesës së parë. Partizani është sërish në sulm, duke kërkuar barazimin, edhe pse me 10 lojtarë. Ka disa goditje këndi radhazi dhe panik të vazhdueshëm në portën bardheblu, por goli mungon. Për minuta të tëra duket sikur është Tirana me një lojtar më pak, teksa e ka të vështirë të përballojë presionin e të kuqve, por kjo ishte vetëm një shkëndijë, sepse bardheblutë e godasin kundërshtarin në momentin më të mirë. Më saktë, Partizani dënon veten, kur Idrizaj pas një topi në zonë të krosuar nga Ngo, e befason Hoxhën, duke shkaktuar autogol. Këtu ekuilibrat prishen si me telekomandë. Përpjekjet e Partizanit janë të dëshpëruara dhe vetëm Melo me goditjet nga jashtë zone nuk mund të mjaftojë. Egbo hedh në fushë Ernest Muçin dhe sulmuesi ia shpërblen me një dopietë. Një mbrëmje fantastike për talentin që zëvendëson Ngonë. Fillimisht, përfiton nga një top i mbetur në zonë pas goditjes së Torasës dhe grushtimit të Hoxhës, duke shënuar golin e katërt. Ndërsa rrjeta e pestë ishte një kryevepër. Sulmuesi mori përsipër një goditje dënimi nga 25 metra distancë dhe e dërgoi topin në trekëndësh, duke e bërë të pavlefshme hedhjen e Hoxhës. Në fund, si për të prishur syrin, Torasa bën një ndërhyrje horror dhe del me të kuq, por kur rezultati është 5-1, kjo nuk ndihet fare. Festa është legjitime dhe bardheblutë konfirmohen tashmë si pretendentët kryesorë për titullin kampion.